სამცხე–ჯავახეთის გუბერნატორი პარტიულ შეხვედრებზე სამსახურის ავტომანქანით დადის [Photo]

ადიგენში მმართველმა გუნდმა მაჟორიტარი დეპუტატობის კანდიდატები ორშაბათს, 25 სექტემბერს წარადგინა. აღნიშნულ შეხვედრას ესწრებოდა სამცხე–ჯავახეთის გუბერნატორი აკაკი მაჭუტაძეც, რომელიც „ოცნების“ შტაბში “Mercedes Benz”–ის ავტომობილით იმყოფებოდა, რომელიც სახელმწიფო რწმუნებულის – გუბერნატორის ადმინისტრაციის ბალანსზე ირიცხება.

როგორც სამხარეო ადმინისტრაციიდან გამოთხოვილ წერილში ვკითხულობთ გუბერნატორის ადმინისტრაციის ბალანსზე 10 სხვადასხვა მარკის ავტომობილია, მათ შორის "Mercedes Benz”, სახელმწიფო ნომრით – RR- 707-SS. აღნიშნული მანქანა, სამხარეო ადმინისტრაციას, შსს–მ, 2014 წელს დროებით სარგებლობაში გადასცა.

საქართველოს ახალგაზრდა იურისტთა ასოციაციის გორის ოფისის ხელმძღვანელის ქეთი ბებიაშვილის განმარტებით, ამ ქმედებით გუბერნატორმა ადმინისტრაციული რესურსი გამოიყენა, რაც 2000 ლარიან ჯარიმას ითვალიწინებს. მისი თქმით, გუბერნატორს საარჩევნო შეხვედრებზე, სამსახურებრივი ავტომანქანით გადაადგილების უფლება იმ შემთხვევაში ექნებოდა, სახელმწიფო დაცვით რომ გადაადგილდებოდეს.

„ნუსხაში, რომელიც განსაზღვრავს პირებს, ვისაც სახელმწიფო დაცვა ემსახურება, გუბერნატორი არ შედის, შესაბამისად, მას არ აქვს უფლება სახელმწიფოებრივი ავტოსატრანსპორტო საშუალება გამოიყენოს საარჩევნო მიზნებისთვის, აგიტაციაში მონაწილეობის მისაღებად“, – აცხადებს წეთი ბებიაშვილი.

რატომ იმყოფებოდა გუბერნატორი „ქართული ოცნების“ შეხვედრაზე სამსახურეობრივი ავტომანქანით, ამ გასარკვევად, „სამხრეთის კარიბჭე“ სამცხე–ჯავახეთის სამხარეო ადმინისტრაციის საზოგადოებასთან ურთიერთობის სამსახურს დაუკავშირდა. თუმცა, კომანტარზე უარი განაცხადეს და იქვე გვითხრეს, რომ გუბერნატორი მოსახლეობასთან სააგიტაციო შეხვედრებზე სამსახურეობრივი ავტომანქანით არ დადის.

შეგახსენებთ, საუბარი არ არის გუბერნატორის სოფლებში სიარულზე, 25 სექტემბერს გუბერნატორი ადიგენში „ქართული ოცნების“ მაჟორიტარობის კანდიდატებისა და პარტიული სიის წარდგენას ესწრებოდა.

აქვე, განვმარტავთ, რომ ეს არ არის პირველი შემთხვევა, როდესაც პოლიტიკურ შეხვედრაზე მხარის რწმუნებული სამსახურეობრივი ავტომანქანით მიდის. გუბერნატორი ამავე მანქანით იმყოფებოდა ახალციხეში 14 სექტემბერს, „ქართული ოცნების“ ახალციხის შტაბში, ახალციხის მაჟორიტარების წარდგენაზეც.







[თინათინ ზაზაძე, ადიგენი]


სტატია ქვეყნდება პროექტის „გაცნობიერებული არჩევანი–დემოკრატიის ფუნდამეტი“ ფარგლებში. ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ ”ღია საზოგადოება-საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.