ადიგენში, ღარღვლის ტყეში ხაძნრის ჩასაქრობად მოხალისეების მობილიზება დაიწყო

საგანგებო სიტუაციების მართვის სამსახურის ინფორმაციით, ღარღვლის ტყეში ცეცხლი ბუჩქნარს, ბალახს და ხეებს უკიდია. მთელი ღამის განმავლობაში ადგილზე რეგიონის რამდენიმე ათეული მეხანძრე–მაშველი მუშაობდა, ისინი ცეცხლის ლოკალიზებას ამ დრომდე ცდილობენ.

სტიქიის ზონაში, ცეცხლის ქრობის პროცესში ჩაერთვება თუ არა ხანძარ საწინააღმდეგო ვერტმფრენი ეს, ჯერ უცნობია.

ტერიტორია, სადაც ხანძარია, მიუდგომელი ადგილია. ცეცხლის კერებთან მისასვლელად, მთელი ღამის განმავლობაში, მძიმე ტექნიკა გზას ჭრიდა. აქ გართულებულია კომუნიკაციაც.

ადიგენის გამგეობის ინფორმაციით ცეცხლი, რამდენიმე ჰექტარ ტყის მასივს უკიდია, თუმცა ზუსტი რაოდენობა უცნობია. მათივე ინფორმაციით, როგორც სოფელ დერცელში, ისე დაბა ადიგენში ადგილობრივი მოხალისეების მობილიზება დაიწყო, რომლებიც ხანძრის ლოკალიზების პროცესში სახანძრო ჯგუფებთან ერთად ჩაერთვებიან.

შეგახსენებთ, რომ ადიგენში, სოფელ დერცელიდან 10 კმ–ში ხანძარი, გუშინ 21 სექტემბერს, საღამოს გაჩნადა.

[sknews.ge]