ხანძრის ხუთი კერა სამცხე–ჯავახეთში – 22 სექტემბერი

ხანძარი წაღვერში. 22 სექტემბერი, 2017წ. ფოტო: ©ნინი ჯიქურაშვილი

ორი დღეა ხანძარს ებრძვიან ადიგენში. 21 სექტემბერს, სოფელ დერცელიდან 10 კმ–ში, ტყის მასივში დაახლოებით ხუთ ჰექტარზე ხანძარი გაჩნდა. ამ დროისათვის ადგილზე ღია ცეცხლი აღარ არის, თუმცა ათეულობით მეხანძრე–მაშველი და 100–ზე მეტი ადგილობრივი მოხალისე ცეცხლის ლოკალიზებას ცდილობს. ხანძარი ტყის ფერდობზე ხეების ნაწილზე, ბალახსა და ბუჩქნარზეა გაჩენილი.

დღის პირველ ნახევარში, ბალახსა და ბუჩქნარს ცეცხლი ეკიდა ადიგენში ფერსათის მთის ფერდობზეც. თუმცა, როგორც საგანგებო სიტუაციების მართვის სამსახურში ამბობენ, მასშტაბები დიდი არ ყოფილა, ამიტომ მეხანძრე–მაშველებმა ცეცხლის კერების ლიკვიდირება მალე მოახერხეს.

ხანძარია ბორჯომშიც, დაბა წაღვერის მიმდებარედ, არჯევანიძეების ტყის გაგრძელებაზე, ცეცხლი სავარაუდოდ მეხის ჩამოვარდნის შედეგად გაჩნდა. ადგილზე უკვე მუშაობენ სახანძრო ჯგუფები. ტყის მასივის რა ფართობს უკიდია ცეცხლი, ამ დროისათვის უცნობია.

დღეს, 22 სექტემბერს, ხანძრის ორი კერა დაფიქსირდა ასპინძაშიც. ვარძიიდან რამდენიმე კილომეტრში საძოვრები იწვის, ცეცხლის ლოკალიზება ამ დრომდე ვერ ხერხდება. ადგილზე 20–მდე მეხანძრე–მაშველი მუშაობს. როგორც ადგილობრივები ამბობენ ცეცხლი სავარაუდოდ 30 ჰექტარზეა მოდებული.

ხანძარია ასპინძაში, სოფელ რუსთავიდან 12 კმ–ში ინდუსის ტყეშიც. ადგილზე მობილიზებულნი არიან სახანძრო–სამაშველო ჯგუფები. ტერიტორიაზე სათიბებიც არის, ამიტომ ცეცხლი ბალახს უკიდია თუ ტყის მასივს, ეს ჯერ უცნობია. თუმცა ადგილობრივები ამბობენ, რომ ხანძრის მასშტაბები სავარაუდოდ დიდია.

რაც შეეხება გუშინდელ დღეს, გუშინ ხანძარი იყო ახალციხეში: ურაველში, ანდრიაწმინდაში, მუგარეთში და ასევე, ქალაქ ახალციხის გასასვლელში, ახალციხე–ახალქალაქის გზაზე. ამ ოთხი კერიდან, შედარებით რთული ვითარება იყო მუგარეთში, სადაც არსებობდა ცეცხლის ტყეში გადასვლის საფრთხე, დანარჩენ სამ შემთხვევაში ცეცხლი მინდორს ეკიდა. გუშინდელი ოთხივე კერა უკვე სრულად ჩამქრალია.

[sknews.ge]