ადიგენში ‘ევროპული საქართველოს’ მაჟორიტარობის კანდიდატი ზეწოლაზე ალაპარაკდა [Video]

ბრიფინგი "ევროპული საქართველოს" ოფისში. ფოტოზე: პარტიის მერობის კანდიდატი ადიგენში გელა სარაშვილი და სერგი კაპანაძე

მურმან წითაშვილი ამბობს, რომ ჭიტაძემ გუშინ, 18 სექტემბერს, კაბინეტში დაიბარა და კანდიდატურის მოხსნა მოსთხოვა, წინააღმდეგ შემთხვევაში სამსახურიდან გათავისუფლებით დაემუქრა: „მითხრა, რომ დავალებული აქვს „ოცნებიდან“ და თუ არ დავტოვებ სამსახურს, გამათავისუფლებს. მიუხედავად იმისა, რომ ხელშეკრულებით აყვანილი თანამშრომელი ვარ და უკვე ორმოც წელზე მეტია ადიგენს ვემსახურები“.

წითაშვილი ირწმუნება, რომ ამირან ჭიტაძე „ქართული ოცნების“ მაჟორიტარობის კანდიდატია, ისევ დაბაში, ანუ, მისი კონკურენტია და ამიტომაც სურს კონკურენტი ხელქვეითის ჩამოშორება: „არ მოვხსნი ჩემს კანდიდატურას და არც სამსახურს არ დავტოვებ. მეუღლე ცუდად მყავს და ყოველთვის წამლები სჭირდება სამკურნალოდ, სამსახური ხომ მინდა, ოჯახი რომ ვარჩინო“.

ადიგენის ვეტერინარიული სამსახურის ხელმძღვანელი ამირან ჭიტაძე თანამშრომელზე ზეწოლას კატეგორიულად უარყოფს: „ეტყობა დაავალეს, რომ ეგრე მოქცეულიყო. რა ზეწოლა, რის ზეწოლა. ნურავის ნურაფერს ნუ უსმენთ“.

ჭიტაძემ „ქართული ოცნების“ მაჟორიტარობის კანდიდატობაც უარყო და განაცხადა, რომ ჯერ არავის დაუსახელებია: „ეს რაში გაინტერესებთ, ან აქ რა შუაშია. ჯერ არ ვიცი არაფერი, შეიძლება ვიყო, შეიძლება არა, არავის არაფერი აქვს ამაზე გადაწყვეტილი. ჩემი უფლებაა, მინდა „ოცნების“ მაჟორიტარი ვიქნები, მინდა სხვა პარტიის“.

მურმან წითაძემ ხელმძღვანელის მხრიდან ზეწოლის გამო პარტია „ევროპული საქართველოს“ უკვე მიმართა. აღნიშნულთან დაკავშირებით პარტიის ცენტრალურ ოფისში ბრიფინგიც გაიმართა.



[ლუბა გიორგაძე, ადიგენი]