ვანო მერაბიშვილის მშობლიურ სოფელში 'ოცნებას' კონკურენტი აღარ ჰყავს

ადიგენის მუნიციპალიტეტის სოფელ უდეში „ქართული ოცნების“ მაჟორიტარი დეპუტატობის კანდიდატს ვაჟა ობოლაშვილს კონკურენტი აღარ ჰყავს. აქ კანდიდატურები მოიხსნეს „ნაციონალური მოძრაობის“ მაჟორიტარობის კანდიდატმა რამაზ მერაბიშვილმა და „ბურჯანაძე - დემოკრატების“ კანდიდატმა იოსებ ობოლაშვილმა.

მას შემდეგ, ვერცერთ მათგანს, ვერც „ნაციონალებისა“ და ვერც „ბურჯანაძე - დემოკრატების“ წარმომადგენლები ვერ უკავშირდებიან. ორივე პარტიაში ამბობენ, რომ ყოფილ კანდიდატებს მობილური ტელეფონები გამორთული აქვთ. ასევე, ორივე პარტიაში აცხადებენ, რომ ზეწოლა მათ წარმომადგენლებზე „ოცნების“ მხრიდან განხორციელდა.

„რაც კანდიდატურა მოიხსნა, აღარ გვინახავს, ვერ ვუკავშირდებით, მაგრამ მანამდე ჩემთან საუბარში ამბობდა, რომ კანდიდატურის მოხსნას ავთო კაჭკაჭიშვილი აძალებდა. დაჭერით ემუქრებოდნენ, საქმე მის ძველ სამსახურს ეხებოდა“, - ამბობს ადიგენში „ნაციონალური მოძრაობის“ გამგებლობის კანდიდატი სიმონ პარუნაშვილი.

„ოცნებას“ ზეწოლაში ადანაშაულებს „ბურჯანაძე - დემოკრატების“ რეგიონული შტაბის უფროსი ჯიმშერ გოგოლაურიც: „მანდ მაჟორიტარი დეპუტატობის კანდიდატი მხოლოდ „ოცნებიდან“ დარჩა. ამიტომ ამას კითხვაც კი არ სჭირდება, თუ რა მოხდა. ფაქტი სახეზეა, ზეწოლა „ოცნების“ მხრიდან განხორციელდა“.

გარდა უდის მაჟორიტარებისა, კანდიდატურები საარჩევნო სუბიექტებმა ახალციხეშიც მოხსნეს. იმ 20 სუბიექტს შორის, ვინც კანდიდატურა მოხსნა, ერთ–ერთი „ნაციონალური მოძრაობის“ სიის მეშვიდე ნომერი ნიკოლოზ ლაბაძეა.

„პირადი პრობლემები მქონდა. თან ეს ნაწილობრივ ჩემს ბიძაშვილებსა და ნათესავებსაც უკავშირდება“, - ამბობს ლაბაძე.

პირადი პრობლემებითა და საკუთარი გადაწყვეტილებით ხსნიან კანდიდატურის გაუქმებას სხვა საარჩევნო სიბუექტებიც. ოპოზიციური პარტიების წარმომადგენლები კი პირად საუბრებში აცხადებენ, რომ საარჩევნო სუბიექტებზე „ოცნების“ წარმომადგენლებთან ერთად ზეწოლა ყოფილმა პატიმრებმა, ე.წ. შავებმაც განახორციელეს.

ადიგენში პარტია „ქართული ოცნების“ თავმჯდომარე და გუბერნატორის მოადგილე ავთანდილ კაჭკაჭიშვილი კოალიციის მხრიდან რაიმე ტიპის ზეწოლას ოპოზიციური პარტიების წარმომადგენლებზე კატეგორიულად უარყოფს. იგი აცხადებს, რომ მათ, ვინც უდეში კანდიდატურა მოიხსნეს, პირადად არც კი იცნობს.

„თავიანთი ბინძური კამპანიით უნდათ „ოცნებას“ ჩირქი მოსცხონ. არ ვიცი ასეთ რაღაცეებს საიდან იგონებენ“, - აცხადებს კაჭკაჭიშვილი და ამატებს, - უდეში „ოცნებას“ კონკურენტი რომ არ ჰყავს, ეს ნამდვილად ცუდია“.

[თამუნა უჩიძე, ახალციხე]