რა ფართობი დაიწვა მესხეთის ტყეებში ხანძრების შედეგად

ბორჯომში 20-26 აგვისტოს აეროფოტოსურათების დეშიფრირების საფუძველზე, წინასწარი მონაცემებით 2017 წლის ხანძარის ფართობი 232 ჰა-ს შეადგენს. როგორც გარემოსდაცვის სამინისტროში გვიხსნიან, ხანძრის გავრცელების მთლიანი პერიმეტრი 757 ჰა-ს შეადგენდა, თუმცა აქედან 525 ჰა 2008 წლის ნახანძრალი ტერიტორია იყო და აქ ტყის მასივი 2008 წლის ხანძრის შედეგად განადგურდა.

რაც შეეხება ბორჯომ-ხარაგაულის ეროვნული პარკის აბასთუმნის უბანს, პირველადი მონაცემებით აქ ხანძარი 20 ჰა-ზე მეტ ფართობზე იყო გავრცელებული.

„ცეცხლი წიწვოვან, ფიჭვნარ ტყეში გაჩნდა. ძირითადად დაიწვა ბალახი და ძირსნაყარი ტოტები. საფრთხე არ შექმნიათ ტერიტორიაზე მობინადრე ცხოველებს“, – აცხადებენ გარემოსდაცვის სამინისტროში.

სვირში კი, ახალციხის მუნიციპალიტეტის გამგეობის ინფორმაციით, დაახლოებით 2–ჰა ფართობი დაიწვა.

„ნახანძრალი ფართობების ზუსტი მონაცემი, მათ შორის დაზიანების კატეგორიების მიხედვით, ცნობილი გახდება მხოლოდ დეტალური საველე შესწავლის შედეგად, რომელსაც საქართველოს გარემოსა და ბუნებრივი რესურსების დაცვის სამინისტრო უახლოეს მომავალში განახორციელებს“, – აცხადებენ გარემოსდაცვის სამინისტროს საზოგადოებასთან ურთიერთობის სამსახურში.

შეგახსენებთ, რომ 20 აგვისტოდან 3 სექტემბრამდე ჯერ ბორჯომში, შემდეგ კი ახალციხესა და ადიგენში ტყეები იწვოდა. ბორჯომში ტყეში ცეცხლს ექვსი, ახალციხეში სოფელ სვირში ოთხი, აბასთუმანში კი ხუთი დღე ავიაციით, მძიმე ტექნიკითა და ცოცხალი ძალით ებრძოდნენ;

[თამუნა უჩიძე, ახალციხე]