მესამე თვეა სამცხე–ჯავახეთის უნივერსიტეტს რექტორი არ ჰყავს

სამცხე–ჯავახეთის სახელმწიფო უნივერსიტეტში განათლების სამინისტროს პასუხს ელიან. ჯეჯელავას უწყებამ სასწავლებელს წესდებაში შეტანილი ცვლილებები უნდა დაუმტკიცოს. მხოლოდ ამის შემდეგ იქნება შესაძლებელი, რომ ხელძღვანელის გარეშე დარჩენილ უნივერსიტეტში რექტორის მოვალეობის შემსრულებელი დანიშნონ, მოგვიანებით კი რექტორის არჩევნები ჩაატარონ.

როგორც სასწავლებელში აცხადებენ, ამ დრომდე სამინისტროდან წესდებაში შეტანილი ცვლილებების დამტკიცების შესახებ პასუხი არ მიუღიათ. უნივერსიტეტი კი სასწავლო პროცესს 18 სექტემბერს აახლებს. ამის გამო, როგორც სასწავლებლის ადმინისტრაციაში გვიხსნიან უნივერსიტეტში გარკვეული პროცესები ფეხდება.

„ბუნებრივია, ის რომ არც რექტორია და არც მოვალეობის შემსრულებელი პრობლემებს ქმნის. ამის გამო პრობლემები დღესაც გვაქვს. არის ბრძანებები რომლებსაც ხელს მხოლოდ რექტორი, ან მისი მოვალეობის შემსრულებელი აწერს“, – აცხადებს უნივერსიტეტის რექტორის მოადგილე სასწავლო მიმართულებაში ნიკოლოზ ახალკაცი.

მისი თქმით, ყველაზე დიდი სირთულე მაინც აბიტურიენტების ჩარიცხვებია: „აბიტურიენტების ჩარიცხვაზე ბოლო ვადა პირველ ოქტომბრამდე გვაქვს. ჩარიცხვებს ბაკალავრიატში, დოქტორანტურაში, მაგისტრატურაში საბოლოო დასკვნით აქტს ხელი რექტორმა, ან მოვალეობის შემსრულებელმა უნდა მოწეროს. ჩვენ ბუნებრივია ამ პროცესებს არ ვაფერხებთ, ოქტომბრამდე დამტკიცდება ალბათ წესდება და ყველაფერი ჩვეულ რეჟიმში გაგრძელდება“.

შეგახსენებთ, რომ სამცხე–ჯავახეთის უნივერსიტეტი სამართლებრივ ჩიხში შევიდა, სასწავლებელი ხელმძღვანელის გარეშე გაურკვეველი ვადით 3 ივლისიდან დარჩა.

[თამუნა უჩიძე, ახალციხე]