რექტორის მოვალეობის შემსრულებლის ასარჩევად წესდებაში ცვლილება შედის

სამცხე–ჯავახეთის უნივერსიტეტის წარმომადგენლობითმა და აკადემიურმა საბჭომ სასწავლებლის წესდებაში ცვლილების შეტანის საკითხზე უკვე იმსჯელა. 4 ივლისს გამართულ რიგგარეშე სხდომაზე საბჭოს მიერ მიღებული გადაწყვეტილების მიხედვით წედებაში მე–14 მუხლის მე–10 პუნქტს შემდეგი ჩანაწერა ჩაემატა: „საარჩევნო კოლეგიამ აირჩიოს რექტორის მოვალეობის შემსრულებელი“.

სამცხე–ჯავახეთის უნივერსიტეტის იურისტის თამარ ჟუჟუნაძის განცხადებით, დღეიდან დოკუმენტი იმ სამართლებრივ პროცედურებს გაივლის რაც კანონითაა გათვალისწინებული: „მას შემდეგ რაც განათლების მინისტრი წესდებაში შესულ ცვლილებას დაამტკიცებს, ის საკანონმდებლო მაცნეზე აიტვირთება“.

მისი თქმით, ამ პროცედურებს მაქსიმუმ 6 თვე სჭირდება, თუმცა შესაძლებელია ბევრად უფრო მცირე დროშიც მოგვარდეს.

ამ ხნის განმავლობაში უნივერსიტეტს არც რექტორი და არც მისი მოვალეობის დროებით შემსრულებელი ეყოლება. შეკითხვაზე, შეიძლება თუ არა რომ ამ ვითარებამ სასწავლებელში სამართლებრივად რიგი პროცესები შეაფერხოს, ან რაიმე პრობლემა შექმნას, ჟუჟუნაძე გვპასუხობს:
„მნიშვნელოვანი პრობლემა არ უნდა წარმოიქმნას, რადგან უნივერსიტეტს ხუთი მართვის ორგანო ჰყავს. მათ შორის ერთ–ერთი რექტორია. ასევე, არიან რექტორის მოადგილეები დარგების მიხედვით, ამიტომ მიმდინარე პროცესებს ყველა თავისი კომპეტენციის ფარგლებში გაუძღვება“.

შეგახსენებთ, რომ სამცხე–ჯავახეთის უნივერსიტეტი სამართლებრივ ჩიხში შევიდა, სასწავლებელი ხელმძღვანელის გარეშე გაურკვეველი ვადით 3 ივლისიდან დარჩა. ამ დღეს უნივერსიტეტში რექტორის არჩევნები გაიმათა, თუმვა გამარჯვებული ვერ გამოვლინდა. ვითარება, კი რომელიც რექტორის არჩევნებმა შექმნა, კანონით არ რეგულირდება; წესდებაში ცვლილების შეტანა საბჭოს სწორედ ამის გამო გახდა.

[თამუნა უჩიძე, ახალციხე]