ურექტორობის გამო უნივერსიტეტში პირველკურსელთა ჩარიცხვა ვერ ხერხდება

საგანმანათლებლო დაწესებულების ადმინისტრაციას სტუდენთა ჩარიცხვის ბრძანებები 4 ოქტომბრამდე უნდა დაეწერა. სტუდენტების ჩარიცხავაზე ან აღდგენაზე რექტორის, ან მისი მოვალეობის შემსრულებლის დასტურია საჭირო, იმის გამო, რომ სამცხე–ჯავახეთის სახელმწიფო უნივერსიტეტში რექტორი არ ჰყავთ, ეს პრობლემა ამ დრომდე მოუგვარებელია.

„ვართ მოლოდინის რეჟიმში, ვადა გასულია, მაგრამ მე დავუკავშირდი სამინისტროს და მითხრეს, რომ ყველაფერი მოგვარდება. სამინისტრო გარდამავალ დებულებას შეიმუშავებს“, – განაცხადა უნივერსიტეტის რექტორის მოადგილემ სასწავლო მიმართულებაში ნიკოლოზ ახალკაცმა.
მისივე თქმით, ამ შემთხვევაში სტუდენტები არ დაზარალდებიან, ისინი სასწავლო პროცესში სასწავლო წლის დაწყების დღიდან არიან ჩართული.

შეგახსენებთ, რომ სამცხე–ჯავახეთის უნივერსიტეტი სამართლებრივ ჩიხში შევიდა, სასწავლებელი ხელმძღვანელის გარეშე გაურკვეველი ვადით 3 ივლისიდან დარჩა. ურექტორობის გამო კი, დაწესებულებაში მთელი რიგი პრობლემები იქმნება. სწორედ ამიტომ უნივერსიტეტის წარმომადგენლობითმა საბჭომ განათლების სამინისტროს შემუშავებული წესდება ორჯერ გადაუგზავნა იმ მოთხოვნით, რომ ვიდრე რექტორს აირჩევენ, მანამდე დაწესებულებას რექტორის მოვალეობის შემსრულებელი ხელმძღვანელობდეს, თუმცა ამ დრომდე უნივერსიტეტს მოთხოვნაზე დასტური არ მიუღია.

„გადაგზავნილია ჩვენი დადგენილება, ამას გარკვეული პროცედური სჭირდება. რეგისტრაციას გაივლის წესდება, შესაბამისად მიეცემა მსვლელობა რექტორის მოვალეობის დანიშვასაც“, – ამბობს ნიკო ახალკაცი.

უნივერსიტეტში შექმნილ მდგომარეობაზე გადაცემა „საფეხურში“ ისაუბრა განათლებისა და მეცნიერების მინისტრის მოადგილემ თამაზ მარსაგიშვილმაც.

„სამწუხაროდ ასეთი ჩიხური სიტუაციები აღმოჩნდა ძალიან ბევრი ჩვენს კანონმდებლობაში. გვიხდება ამის გამოსწორება. ამავდროულად, კანონში ცვლილების შეტანა ერთი უნივერსიტეტის მაგალითზე, ცოტა რთულია. იმის გამო, რომ უნდა მომზადდეს შესწორებები, უნდა გაიაროს ექსპერტიზა, დაინტერესებული უნივერსიტეტები უნდა გაეცნონ ამ საკითხს, შესაძლოა მათაც აქვთ ასეთი შემთხვევები და ეს დროში ძალიან იწელება“, – განაცხადა ვახტანგ მარსაგიშვილმა.

მისივე თქმით, მიუხედავად ამისა არც უნივერსიტეტის არსებობას და არც სტუდენტთა სწავლებას ამ მხრივ საფრთხე არ ემუქრება: „არსებობს შესაძლებლობა, რომ გამონაკლისის სახით სამინისტრომ განახორციელოს რიგი ღონისძიებები, როცა ასეთი ჩიხური სიტუაცია იქნება. კანონში არის ხარვეზები და მუდმივად შედის ცვლილებები. ეს გამოვლინდა იმ მიზეზის გამო, რომ არჩევნებზე რექტორი ვერ აირჩიეს. თუ არ აირჩევდნენ, ასეთი ვარიანტი გათვალიწინებული არ იყო კანონში. ნუ რას ვიზამთ, სამწუხაროდ, რეალობა ზოგჯერ ისეთი არის, როგორც ახლა მოხდა. მე იმედი მაქვს, რომ შემდეგი არჩევნებისთვის ეს ყველაფერი გამოსწორდება“.

[თინათინ ზაზაძე, ახალციხე]