„ევროპულმა საქართველომ“ ასპინძასა და ადიგენში მერობის კანდიდატები წარადგინა

ახალციხისა და ბორჯომის შემდეგ პარტია „ევროპულმა საქართველო“ მერობის კანდიდატები ადიგენსა და ასპინძაშიც დაასახელა.დაბა ადიგენის ცენტრში, პარტიის მხარდამჭერები 15:00 საათისათვის შეიკრიბნენ. მერობის კანდიდატი მათ პარტიის ლიდერებმა გიგი უგულავამ და გიგა ბოკერიამ წარუდგინეს.

შეხვედრის დასაწყისში შეკრებილებს გიგი უგულავამ მიმართა:„მიუხედავად იმისა რომ ადიგენი პატარა რაიონია, აქაც როგორც ყველგან პრობლემები იგივეა – უპატრონობა, მიტოვებულობა, გადაგდებულობის განცდა, რომელსაც ასხივებს „ქართული ოცნება“. ადიგენში პენსიის გაზრდა 25 ლარითაა შესაძლებელი და თუ ჩვენ გავიმარჯვებთ პირველ 100 დღეში განვახორციელებთ ამას“.

მან ადგილობრივებს ინფარსტრუქტურულ პრობლემებზეც ესაუბრა და ამომრჩევლებს დაპირდა, რომ მთავარი პრიორიტეტი კურორტ აბასთუმნის მოწყობა იქნება: „ ყველაფერს რომ თავი დავანებოთ აბასთუმანი, რომელიც საქართველოს კურორტი იყო მიტოვებულია. მარტო იქ შეიძლება იმდენი სამუშაო ადგილი შეიქმნას, რომ მთელი ადიგენი სხვასხვა ფორმით დასაქმდეს, თუმცა ამ ყველაფერს ეს მთავრობა ვეღარ გააკეთებს, ამიტომაც ცვლილებები საჭიროა“.

სიტყვით გამოსვლის შემდეგ,“ევროპული საქართველოს“ გენერალურმა მდივანმა მერობის კანდიდატად, ადგილობრივი გელა სარაშვილი წარადგინა. სარაშვილი 1997 წლიდან 2015 წლამდე შსს–ში სხვასხვა ხელმძღვანელ პოზიციებზე მუშაობდა. ამბობს, რომ პარტიაში არასდროს ყოფილა და „ევროპულ საქართველოშიც“ ახლა გაწევრიანდა.

„ჩემი მთავარი პრიორიტეტი ხალხის გულისტკივილის მოსმენა და იმ პრობლემების მაქსიმალურად ამოწურვაა, რაც მათ გააჩნიათ. ყველა სოფელში ბერი პრობლემაა, ამ ყველაფერს შევისწავლით, მთავარ პრიორიტეტებს ჩამოვაყალიბებთ და დავიწყებთ წინა საარჩევნო კმაპანიას“, – განაცხადა მერობის კანდიდატმა.

მისი თქმით, ადიგენში ადგილობრივები კარგად იცნობენ და ამიტომ არჩევნებში გამარჯვების შანსიც აქვს.



ადიგენის შემდეგ, „ევროპული საქართველოს“ ლიდერებმა ასპინძაში გადაინაცვლეს და ადგილობრივებს ასპინძის მერობის კანდიდატად, საქართველოს პარლამენტში ყოფილი მაჟორიტარი დეპუტატი ტარიელ ლონდარიძე წარუდგინეს. ლონდარიძე დეპუტატობის მანდატისათვის 2016 წლის საპარლამენტო არჩევნებზეც იბრძოდა. გარდა ამისა, იგი წლების განმავლობაში თავდაცის სამინისტროში სხვასხვა წამყვან თანამდებობებზე მუშაობდა.

„ასპინძელებს სჭირდებათ რეალური ცვლილებები, იმისათვის, რომ დღევანდელი ვითარება უკეთესობისკენ შეიცვალოს. ჩვენ უნდა მივიღოთ ისეთი თვითმმართველობები, რომლებიც ხალხს მოემსახურება და არა პირიქით. ჩვენი დაპირებები განეკუთვნება იმ ადამიანებს ვინც ნამდვილად საჭიროებს დახმარებას, განსაკუთრებით ვიზრუნებთ ახალგაზრდების პრობლემებზე და მათი დასაქმების კუთხით გადავდგამთ აქტიურ ნაბიჯებს. ჩვენი პრიორიტეტი იქნება ასევე ასპინძაში ტურიზმის განვითარება“, – განაცხადა ლონდარიძემ წარდგენისას.

„ევროპულ საქართველო" მერობის კანდიდატებს ახალქალაქსა და ნინოწმინდაში უახლოეს დღეებში წარადგენს.




[ლუბა გიორგაძე, ადიგენი –ასპინძა]