ახალციხეში ასფალტით დალუქული საკანალიზაციო ჭები მოაწესრიგეს

მშენებელმა კომპანიამ საკანალიზაციო ჭების ხუფები ნიკოლაძის, ქეთევან დედოფლისა და კლდიაშვილის ქუჩებზე დალუქა. გაერთიანებული წყალმომარაგების კომპანიაში ამბობენ, რომ ხუფების საკითხი სამივე ქუჩზე მოაწესრიგეს.

„გარდა ამ სამი ქუჩისა, ჭების სახურავები დაზიანებული იყო კიდევ სამ ქუჩზე და ისინიც გავაკეთეთ. ასფალტის გადატარება არცერთ საკანალიზაციო ჭაზე არ შეიძლება, ეს გათვალისწინებული პროექტებში თავიდანვე უნდა იყოს“, – ამბობს გაერთიანებული წყალმომარაგების კომპანიის ახალციხის სერვისცენტრის მენეჯერი გია გოგოლაური.

ნიკოლაძის, კლდიაშვილისა და ქეთევან დედოფლის ქუჩები 2017 წლის სექტემბერ–ოქტომბერში მოასფალტდა. მაშინ ახალციხის მერიის მიერ გამოცხადებულ ტენდერში გამარჯვებულმა კომპანიამ „საგზაო სამშენებლო სამმართველო N1–მა“ ახალციხის 10 ქუჩის რეაბილიტაციისთვის 795 000 ლარი დახარჯა.





[sknews.ge]