ახალციხეში გზების დაგების დროს საკანალიზაციო ჭების ხუფები დალუქეს

„ასფალტის დაგების შემდეგ ჭაზე მანქანამ რომ გადაიარა, იმ ადგილზე გზამ ჩაიწია და ხუფი ქვევით ჩავარდა, სასმელი წყლის მილს დაეცა და დააზიანა. ამიტომ კანალიზაცია სასმელ წყალს შეერია. მერე მილები გააკეთეს, მაგრამ ჭას სახურავი აღარ აქვს, ჟეშტია დაფარებული და გვეშინია ბავშვები არ ჩავარდნენ“, – გვიყვება კლდიაშვილის ქუჩაზე მცხოვრები როზა ზაზაძე.

ნიკოლაძის ქუჩაზე ასფალტით დალუქული ჭა არ ჩავარდნილა, თუმცა, აქ მისი მოთხრა მოუხდათ.

„კანალიზაცია გაიჭედა და მოანგრიეს, ამიტომ ახალი დაგებული გზის ნაწილიც დაზიანდა. იმის მერე კარგად დალუქული არ არის და ამიტომ სუნი გვაწუხებს ძალიან“, – ამბობს ნიკოლაძის ქუჩაზე მცხოვრები ზეფურ მელქონიანი.

გზის დაგების შემდეგ მოსაწესრიგებელი დარჩა ღია საკანალიზაციო ჭები ქეთევან დედოფლის ქუჩაზეც. აქ ორი ჭიდან ერთთან ასფალტიც არ დაგებულა, მეორესთან კი გზა მოწესრიგდა, თუმცა ჭა სახურავის გარეშე დარჩა. ახლა ორივე მათგანს სამშენებლო მასალა და ქვები აყრია.

ნიკოლაძის, კლდიაშვილისა და ქეთევან დედოფლის ქუჩები 2017 წლის სექტემბერ–ოქტომბერში მოასფალტდა. მაშინ ახალციხის მერიის მიერ გამოცხადებულ ტენდერში გამარჯვებულმა კომპანიამ „საგზაო სამშენებლო სამმართველო N1–მა“ ახალციხის 10 ქუჩის რეაბილიტაციისთვის 795 000 ლარი დახარჯა.

„პროექტი ახალციხის მერიას ხარვეზების გარეშე ჩავაბარეთ, რაიმე პრობლემა რომ ყოფილიყო მოგვმართავდა“, – გვითხრეს სამშენებლო კომპანიაში.

რატომ ჩაიბარა მერიამ დალუქული ჭებით პროექტი, ან მიიღო თუ არა ამის გამო მშენებლმა შენივნები, ამ შეკითხვებზე ახალციხის მერიიდან პასუხს ველოდებით.

ადგილობრივები კი აცხადებენ, რომ ჯერ კიდევ გზის დაგებამდე, ჭების სახურავების გაკეთება, როგორც ადგილობრივი თვითმმართველობის, ასევე, გაერთიანებული წყალმომარაგების კომპანიის წარმომადგენლებს სთხოვეს: „ყველას ვუთხარით ვისაც კი ეს ამბავი ეხებოდა, მაგრამ ასფალტის დაგება ისე დაიწყეს, რომ ჭების სახურავების გასაკეთებლად აქ არავინ მოსულა“.

საქართველოს გაერთიანებული წყალმომარაგების კომპანიაში ამბობენ, რომ ნიკოლაძისა და ქეთევან დედოფლისა და კლდიაშვილის ქუჩებზე მოსაწესრიგებელ ჭებთან დაკავშირებით მათ „სამხრეთის კარიბჭესგან“ გაიგეს: „ადგილზე მივედით და შევისწავლეთ ეს საკითხი. აღმოჩნდა, რომ კოსტავას ქუჩაც პრობლემურია. ძირითადად ასფალტდგადაგებული საკანალიზაციო სისტემები წარმოადგენს პრობლემას. დავიწყეთ მუშაობა, შეიცვლება ხუფები და სათანადოდ დაილუქება ჭები“.




[ნანა ინასარიძე, ახალციხე]