ადიგენში დამოუკიდებელ კანდიდატებს ერთი გამოეთიშა

დღეს, პირველ სექტემბერს, საინიციატივო ჯგუფების მიერ საოლქოში ხელმოწერების მიტანის ვადა ამოიწურა. ადიგენის საარჩევნო ოლქში დარეგისტრირებული შვიდი საინიციატივო ჯგუფიდან, ერთმა საარჩევნო რეგისტრაცია გააუქმა, ხოლო ორს ხარვეზი დაუდგინდა, რომლის გამოსასასწორებლადაც ორდღიანი ვადა აქვს.

„არის კანონით დადგენლი მოთხოვნები, რომელიც მკაცრად კონტროლდება, მაგალითად: ხმების შეგროვებაზე პასუხისმგებელი პირის ზუსტი მონაცემები, ზოგს ეს ქონდა დავიწყებული, ზოგს რიცხვები ქონდა არასწორად მითითებული, ზოგს ხელმოწერათა არაზუსტი რაოდნეობა აქვს. დაუდგინდათ ხარვეზი და დაუბრუნდათ გაბათილებული ნაწილი“, – განმარტავს ადიგენის საოლქო საარჩევნო კომისიის ხელმძღვანელი ჯაბა მაჭარაშვილი.

მისივე თქმით, ერთმა, გორგულის თემის მაჟორიტარული ოლქის საინიციატივო ჯგუფმა კომისიას რეგისტრაციის გაუქმების მოთხოვნით მიმართა, მათი კანდიდატი თორნიკე გობერიძე იყო.

შეგახსენებთ, რომ ადიგენში 2017 წლის თვითმმართველობის არჩევნებში მონაწილეობისთვის კანდიდატი შვიდმა საინიციატივო ჯგუფმა წარადგინა. აქედან ერთი მერობის დამოუკიდებელი კანდიდატი, გამგებლის ყოფილი მოადგილე, მინდია ჯელიაა. ხოლო დანარჩენი ექვსი მჟორიტარობის კანდიდატები: დაბა ადიგენში ნუგზარ ქაშიბაძე, ბოლაჯურის თემში თენგიზ სხირტლაძე, გორგულის თემში თორნიკე გობერიძე,მლაშის თემში თამაზ დოხაშვილი და ლევან ლობჯანიძე, ხოლო ჭეჭლის თემში ჯიმშერ ბერიძე.

ადიგენის საოლქო კომისიას ხელმოწერების ნამდვილობის გადასამოწმებლად სამი დღის ვადა აქვს. ამის შემდეგ კი მხოლოდ ბოლო ეტაპი, თავად კანდიდატის რეგისტრაცია რჩება. თუ კანდიდატების დარეგისტრირდებიან, მაშინ, 2017 წლის 21 ოქტომბრის ადგილობრივი თვითმმართველობის არჩევნებში ადიგენში 6 დამოუკიდებელი კანდიდატი იქნება.

[თინათინ ზაზაძე, ადიგენი]