შს მინისტრი: თუ ამინდი ხელს შეგვიწყობს, დღეს აბასთუმანში ხანძარი ლოკალიზებული იქნება

"დილიდან ჩვენ უკვე პოზიტიური დინამიკა გვაქვს, შეიძლება ითქვას, რომ ყველა ღია ცეცხლის კერა არის ჩამქრალი, ძალიან ეფექტურად მუშაობს ავიაცია და რაღა თქმა უნდა ცოცხალი ძალა. ჩვენ გვაქვს აწყობილი სრულად კავშირგაბმულობა, პირდაპირი კავშირია ვერტმფრენთან. კონკრეტულ კოორდინატებს აძლევენ თუ სად უნდა დაისხას წყალი, ძალიან ეფექტურად მუშაობენ და თუ დღის ბოლომდე ამინდი შეგვიწყობს ხელს ხანძარი ფაქტობრივად ლოკალიზებული იქნება", – განაცხდა მინისტრმა.

ამ ეტაპზე ისევ უცნობი რჩება რა ფართობზეა მოდებული ხანძარი.

"ცეცხლი როდესაც ქრება, დაკვამლიანება კიდევ უფრო მტი მოდის, ამიტომ, მოდი ნუ ვილაპარაკებთ ფართობზე, ლიკვიდაციის შემდეგ მოგაწვდით ინფორმაციას",– განუცხადა გიორგი მღებრიშვილმა ჟურნალისტებს დღეს, დღის დასაწყისში, აბასთუმანში არსებული ვითარების შეჯამებისას.

როგორც მინისტრმა განაცხადა, ტყეში გაჭრილი გზების საშუალებით სახანძრო ტექნიკა უკვე მივიდა ხანძრის კერებამდე: "250–300 მეტრი კიდევ გაიჭრა, შევიდნენ მანქანები, გაიჭიმა მილები და უკვე ხდება კერების დამუშავება. ისე, რომ სრულიად მობილიზებული ვართ, ყველა ორგანო ჩართულია, კოორდინაციაში ვართ, ბიჭები უზრუნველყოფილი არიან საკვებით, ტექნიკა საწვავით, ყველა წინაპირობაა, რომ დღის ბილომდე ხანძარი იყოს ლოკალიზებული, თუკი ამინდი შეგვიწყობს ხელს".

[sknews.ge]