აბასთუმნის ხანძრის ჩაქრობაში თურქეთის ავიაციაც ჩაერთვება

უწყების მიერ გავრცელებული ინფორმაციით, აბასთუმნის ტყეში ხანძრის ჩაქრობის პროცესში უკრაინული სამაშველო თვითმფრინავი ერთვება. ამის თაობაზე საქართველოს პრემიერ-მინისტრმა და უკრაინის პრეზიდენტმა გუშინ ღამით ისაუბრეს. უკრაინული თვითმფრინავი საქართველოში უახლოეს საათებში შემოვა.

ამავდროულად, თურქეთის რესპუბლიკამ ხანძრის სალიკვიდაციო სამუშაოებში მონაწილეობისთვის ორი ვერტმფრენი და ერთი სამაშველო თვითმფრინავი გამოყო, რომელიც დღის მეორე ნახევარში გამოფრინდება.

როგორც შსს–ში აცხადებენ, დახმარების მიღების თაობაზე დამატებითი კონსულტაციები მიმდინარეობს ირანთან და აზერბაიჯანთან. დახმარების სურვილი გამოხატა საფრანგეთმა, რომელთანაც ქართული მხარე ასევე კონსულტაციებს აწარმოებს.

აბასთუმანში მობილიზებულია შსს-სა და სხვა უწყებების შესაბამისი სამსახურები. საგანგებო შტაბი 24 საათიან მუშაობას განაგრძობს.

შეგახსენებთ, მეორე დღეა აბასთუმანში ებრძვიან ხანძარს, რომელიც მიუვალ ადგილასაა გაჩენილი. გუშინვე ხანძრის ჩაქრობის პროცესში, ცოცხალ ძალასთან ერთად, ჩაერთო ვერტმფრენი. ღამით ვერტმფრენმა მუშაობა შეაჩერა, თუმცა, სამუშაოები მთელი ღამის განმავლობაში გრძელდებოდა. შსს–ს ცნობით, უწყვეტ რეჟიმში მიმდინარეობდა დამატებითი ცოცხალი ძალისა და სახანძრო-სამაშველო ტექნიკის მობილიზება. გაიჭრა 4 კილომეტრამდე გზა, ხანძარსაწინააღმდეგო ტექნიკის ხანძრის კერამდე მისასვლელად.

ამ დროისთვის, მეხანძრე – მაშველებთან და მეტყევეებთან ერთად, ადგილზეა მუშაობენ შსს-ს საგანგებო სიტუაციების მართვის სააგენტოს, განაკუთრებულ დავალებათა დეპარტამენტისა და დაცული ტერიტორიების სააგენტოს 1000-ზე მეტი თანამშრომელი. ხანძარს, ბორჯომ–ხარაგაულის ეროვნული პარკის რეინჟერთა სრული შემადგენლობა ებრძვის. ქრობის პროცესში გუშინვე მოხალისეებიც ჩაერთვნენ. ადგილობრივები ცეცხლის კერეის ლოკალიზებას ნიჩბებით ცდილობენ.

აბასთუმანში გახსნილია სპეციალური შტაბი, ადგილზე იმყოფებიან შინაგან საქმეთა მინისტრი, განსაკუთრებულ დავალებათა დეპარტამენტის უფროსი, ეროვნული სატყეო სააგენტოს უფროსი, სამცხე–ჯავახეთის გუბერნატორი, ადიგენის ადგილობრივი თვითმმართველობის წარმომადგენლები და ახალციხისა და ადიგენის მაჟორიტარი დეპუტატი პარლამენტში.

წინასწარი ინფორმაციით, ბორჯომ–ხარაგაულის ეროვნულ პარკში, აბასთუმნის ტერიტორიაზე 5–7ჰა ტყის ფართობია დამწვარი.

[sknews.ge]