სოფელ დაბაში მეორე მძიმე ღამეა [Photo/Video]

ადგილობრივები ამბობენ, რომ დღეს უკვე ხანძარი მათი სოფლისკენ აღარ მიიწევს და წაღვერისა და ბორჯომის მიმართულებით იშლება.

„სოფელი, შეიძლება ითქვას, რომ გადარჩა. ახლა ბორჯომისკენ უფრო არის საშიშროება. დარწმუნებული ვერ ვიქნებით, მაგრამ დღეს უფრო ნაკლებად არის ხანძრის გავრცელების საფრთხე სოფელში. დღეს ჩვენს დასახმარებლად უფრო მეტი ადამიანი მუშაობს“, – ამბობს დაბაში მცხოვრები ლევან თედიაშვილი.



მისივე თქმით, სოფელში უფრო იმედიანად არიან, რადგან ხვალ 23 აგვისტოს ბორჯომში წვიმაა მოსალოდენლი.

„ხანძარი სოფელთან ახლოს მოვიდა, მაგრამ შიში ნაკლებად გვაქვს, რადგან იქ სახანძრო მანქანებია მობილიზებული. იმედი გვაქვს, რომ რაღაცას გვიშველიან“, – ამბობს დაბაში მცხოვრები ლილი წიქარიშვილი და ამატებს, რომ ეს მძიმე შედეგები დაგვიანებული რეაგირების შედეგია.



ამ ეტაპზე სოფელში სიმშვიდეა, ადგილობრივები გასული ღამის მსგავსად ქუჩაში არიან გამოსულები და ხანძრის კერებს უყურებენ. სოფელში ისევ ძლიერი დაკვამლიანებაა. სამაშველო სამსახურებთან ერთად ხანძრის კერების ჩასაქრობად მუშაობენ სოფლის ახალგაზრდებიც.
„გუშინ უფრო გვეშინოდა. დღეს მობილიზება დიდია. თითქმის მთელი საქართველო აქ არის. რაც არ უნდა იყოს, ჩვენი სახლების დატოვებას არ ვაპირებთ“, – აცხადებენ ადგილობრივები.



შეგახსენებთ, რომ მესამე დღეა ბორჯომში ძლიერ ხანძარს ებრძვიან. დღეს, 22 აგვისიტოს ძლიერი ქარის გამო სოფელ დაბის მიმდებარე ტერიტორიაზე ახალი კერები გაჩნდა, ცეცხლი მოედო ადგილობრივების ნაკვეთებსაც.

ცუდი ღამისა და ხილვადობის გამო ვერტმფრენებმა მუშაობა შეწყვიტეს, ხვალიდან კი ხანძრის ჩასაქრობად 5 ვერტმფრენი და 1 თვითმფრინავი იმუშავებს.



შეგახსენებთ, გუშინ, 21 აგვისტოს, ღამით, დაბაში გაცილებით მძიმე ვითარება იყო.



[თამუნა უჩიძე, თინათინ ზაზაძე, ბორჯომი]