მმართველი გუნდი: ‘სტიქიის ზონაში რეაგირება დროული იყო’

პარლამენტარის, „ქართული ოცნება - დემოკრატიული საქართველოს“ წევრის მამუკა მდინარაძის განმარტებით, ბორჯომში მდგომარეობა ძლიერმა ქარმა გაართულა. მისი თქმით, ხელისუფლების მხრიდან მომხდარს დროული რეაგირება მოყვა. ამას ხანძრის პირველივე დღეს მიმდინარე სამუშაოები ცხადყოფდა.

„ყველა სტრუქტურა სრული მობილზებით მუშაობს. აქ პირველივე დღეს იყო ხანძარი ლოკალიზებული, ამით ჩანდა შესაბამისი სტრუქტურების დროული მუშაობა. ძალიან მცირე კერები იყო დარჩენილი, თუმცა შემდეგ მოხდა ის, რაც ხდება ხოლმე, ქარმა ახალი კერები გააჩინა“, – განაცხადა „სამხრეთის კარიბჭესთან“ საუბრისას მამუკა მდინარაძემ.

მისივე თქმით, ამ ეტაპზე მოსახლეობას საფრთხე არ ემუქრება: „არსებობს ევაკუაციის გეგმა, თუმცა არ არსებობს მისი ამოქმედების აუცილებლობა, ყველა ადამიანი დაცულია. განსაკუთრებული ყურადღება ექცევა ისეთ ადგილებს, სადაც მოსახლეობა მეტ–ნაკლებად ახლოს ცხოვრობს ხანძრის კერებთან. მე ვფიქრობ, რომ ხვალ, 6 –7 ვერტმფრენი გვეყოლება ხანძრის ჩასაქრობად“.

მდინარაძის პოზიციას იზიარებს უმრავლესობის ლიდერი არჩილ თალაკვაძეც. ის აცხადებს, რომ რეაგირება დროული იყო. თუმცა, კითხვას, რატომ იყო მხოლოდ ერთი ვერტმფრენი სტიქიის ზონაში, თალაკვაძე არ პასუხობს.

„იმიტომ რომ მხოლოდ ერთ ვერტმფრენი გვყავს“, – მის ნაცვლად უპასუხა ჩვენს კითხვას რეგიონული განვითარების მინისტრმა ზურაბ ალავიძემ, – „როგორც კი ვითარება გართულდა პრემიერი ადგილე ჩამოვიდა და შტაბი შექმნა“.

შეგახსენებთ, მესამე დღეა მეხანძრე–მაშველები, მოხალისეები, ბორჯომის მცხოვრებლები, ვერტმფრენები, მძიმე ტექნიკა, ბორჯომში, ტყეში, ხანძარს ებრძვიან. ადგილზე შექმნილია საგანგებო შტაბი, რომელიც 24–საათიან რეჟიმში მუშაობს. სტიქიის ზონის მიმდებარე სოფლების: დაბა, ცემი, წაღვერი – ნაწილი დატოვეს დამსვენებლებმა. ცეცხლის ჩაქრობას რთული რელიეფი და ასევე რთული მეტეოროლოგიური პირობები აფერხებს.

დღეს, ხანძრიდან მესამე დღეს, შუადღეს, ცეცხლის ლოკალიზება მოხერხდა, თუმცა, შემდეგ, ქარის გამო, კერები ისევ გაძლიერდა და ქარის მიმართულების ხშირი ცვლილების გამო გაჩნდა ახალი კერებიც.

ხვალ, 23 აგვისტოს, სამუშაოებში ერთვება მეზობელი ქვეყნებიდან გამოგზავნილი ტექნიკაც. საგანგებო შტაბში ფიქრობენ, რომ ხვალინდელი დღე გადამწყვეტი იქნება.

ბორჯომში, სოფელ დაბაში მცხოვრებლები ამბობენ, რომ მობილიზება დაგვიანდა. მთავრობას რეაგირება დროულად რომ დაეწყო, სტიქიის ამ მასშტაბის აცილება შესაძლებელი იქნებოდა.

[sknews.ge]