სატყეო სააგენტოს ინფორმაციით, ბორჯომში 12 ჰექტარზე მეტია დამწვარი

მისი თქმით, ძლიერი ქარის გამო ხანძრის ახალი კერები ჩნდება, თუმცა მათი ლოკალიზება დროულად ხერხდება.

”ძლიერი ქარის გამო ყველაფერი შეიძლება მოხდეს, თუმცა ყველანაირად ვცდილობთ, რომ ლოკალიზება მოვახდინოთ. შექმნილია პრემიერის ხელმძღვანელობით საგანგებო შტაბი. მთელი ღამის განმავლობაში მიმდინარეობდა მუშაობა. გაკეთდა გზები, შევიყვანეთ ტექნიკა და ყველანაირი გზით ვებრძვით სტიქიას. მე ვფიქრობ, 12 ჰექტარზე მეტია ამ ეტაპზე დამწვარი ხანძრის შედეგად”, - განაცხადა ეროვნული სატყეო სააგენტოს ხელმძღვანელმა.

მისივე თქმით, ხანძრის ახალი კერების გაჩენის შედეგად ახალი ნარგავებიც დაიწვა.

შეგახსენებთ, დღეს, დილის 06:30 საათიდან, ბორჯომში, დაბაში, სახანძრო და საავიაციო ტექნიკა ხანძრის ჩაქრობას ცდილობს. სამაშველო სამუშაოებში ჩართულია 500–მდე მეხანძრე–მაშველი, 3 ვერტმფრენი – მათ შორის, ორი საქართველოდან და ერთი აზერბაიჯანიდან, ათობით სახანძრო მანქანა, რომელთა მობილიზება საქართველოს სხვადასხვა რეგიონიდან გახდა საჭირო. როგორც ცნობილია, უახლოეს საათებში თურქეთიდან კიდევ ორ ვერტმფრენს ელოდებიან.

ცეცხლის გავრცელების შესაჩერებლად, წუხელ მთელი ღამის განმავლობაში, ხეობაში დაახლოებით 10 კილომეტრიანი თხრილები გაჭრეს, რაც ხანძრის დასახლებულ პუნქტზე გადასვლას ხელს უშლის.

ცეცხლი სოფლებთან – დაბასა და წაღვერთანაა ახლოს, ამიტომ, წუხელ, ამ სოფლების მცხოვრებთა ნაწილი, გვიან ღამემდე გარეთ იყო.
ხალხის ევაკუაცია საჭირო არ გამხდარა. სოფელ დაბიდან მხოლოდ ერთი, სოფლის განაპირას, ხანძართან ყველაზე ახლოს მცხოვრები ოჯახი გაიყვანეს.

ბორჯომში შექმნილია საგანგებო შტაბი, რომელიც 24–საათიან რეჟიმში მუშაობს.

[ნინო ნარიმანიშვილი, ბორჯომი]