ენმ–ს ასპინძის ორგანიზაციის ყოფილი თავმჯდომარე ენმ–ში დარჩა

ამის შესახებ ბესიკ ბექაურმა „სამხრეთის კარიბჭესთან“ სატელეფონო საუბარში განაცხადა.

„პარტიის რიგით წევრად ვრჩები, „ნაციონალური“ მოძრაობა არ დავტოვე“, – ამბობს ბექაური.

მან „ერთიან ნაციონალურ მოძრაობაში“ შექმნილი უთანხმოების შემდეგ, ვიდრე პარტია ორად გაიყოფოდა, ასპინძის რაიონული ორგანიზაციის თავმჯდომარეობაზე უარი განაცხადა და გადადგა.

შეკითხვაზე, დარჩება თუ არა კვლავ პარტიის რაიონული ორგანიზაციის ხელმძღვანელად ბექაური გვპასუხობს: „ჯერ არ ვიცი, მაგრამ ალბათ არა. ახლა პარტიის რიგითი წევრი ვარ“.

შეგახსენებთ, რომ დაპირისპირება “ერთიან ნაციონალურ მოძრაობაში” საპარლამენტო არჩევნების შემდეგ დაიწყო. პარტიის წევრთა ნაწილი, მათ შორის, გიგი უგულავა, დავით ბაქრაძე, გიგა ბოკერია, ზურაბ ჭიაბერაშვილი და პარტიის დეპუტაცია მოქმედი პოლიტსაბჭოს სხვა წევრებთან ერთად მიხეილ სააკაშვილსა და პოლიტსაბჭოს სხვა წევრებს, ლევან ვარშალომიძეს, ზაზა ბიბილაშვილს, ჩიორა თაქთაქიშვილს, ნუგზარ წიკლაურს, აკო მინაშვილსა და სხვა ლიდერებს დაუპირისპირდა. იმ საკითხებს შორის, რომელზეც პარტიის წევრები ვერ თანხმდებოდნენ, პარლამენტის ბოიკოტი და მეორე ტურებში მონაწილეობის მიღება იყო. მიხეილ სააკაშვილი ამბობდა, რომ მეორე ტურებში მონაწილოების აზრს ვერ ხედავდა, საპირისპირო გადაწყვეტილება მიიღო პარტიის პოლიტსაბჭომ. პარლამენტში შესვლის იდეას პოლიტსაბჭოს მხოლოდ 9 წევრი შეეწინააღმდეგა.

კიდევ ერთი საკითხი, რამაც პარტიაში დაპირისპირება გაამწვავა, მიხეილ სააკაშვილის როლი იყო “ერთიან ნაციონალურ მოძრაობაში”.

[თამუნა უჩიძე, ასპინძა]