სოფელ რუსთავს წელს წყალი არ ექნება

"მტკვარი ჰესის" ხელმძღვანელი პირები ასპინძის მუნიციპალიტეტის გამგეობის წარმომადგენლებს რუსთავში წყლის დაწყვეტის საკითის განსახილველად უკვე შეხვდნენ, თუმცა ვერაფერი გაარკვიეს.

როგორც "მტკვარი ჰესის" დირექტორის მოადგილე ბადრი მათოშვილი "სამხრეთის კარიბჭესთან" აცხადებს, იგი ამჟამად ასპინძის გამგეობის ხელმძღვანელობასთან ერთად, იმაზე ფიქრობს, თუ ვისი სახსრებით უნდა მოხდეს ექსპერტიზის ჩატარება და გეოლოგების დაქირავება, წყლის დაწყვეტის მიზეზის დასადგენად.

"გარემოზე ზემოქმედების შეფასებას" გავეცანი, წინასწარ ყველა გეოლოგიური თუ არქეოლოგიური კვლევა ჩატარებულია. მაგრამ აქ გვირაბი შენდება და წინასწარ ვერ განსაზღვრავ რას გამოიწვევს ის ან როგორ იქნება აგებული ორი კილომეტრით აქეთ წავა თუ იქით", – ამბობს მათოშვილი.

მისივე თქმით, მოსახლეობის მოთხოვნა, რომ წყლის პრობლემა ზაფხულშივე მოგვარდეს, ვერ დაკმაყოფილდება: "ამას ექსპერტიზის ჩატარება სჭირდება, დასკვნის მომზადებას კი დრო. რომ ამბობენ ზაფხულში წყალი გვინდაო, ამას ვერც მუნიციპალიტეტი მოახერხებს და ვერც ჩვენ. თუმცა, შემდეგი წლისათვის, წყალი აუცილებლად ექნებათ," – აცხადებს მათოშვილი.

24 საათიანი წყალმომარაგების აღდგენას დრო რომ სჭირდება, ამაზე ასპინძის გამგებელი ლევან ცაბაძეც საუბრობს. თუმცა "მტკვარი ჰესის" ხელმძღვანელობისაგან განსხვავებით ცაბაძე, ამბობს, რომ სოფელ რუსთავის სასმელი წყლის დაწყვეტის მიზეზების შესწავლა "გაერთიანებული წყალმომარაგების კომპანიის" კომპეტენციაა და არა მისი: "ალტერნატიული გზების მოძიება წყალმომარაგების კომპანიას უკვე დაევალა. მათ ჰყავთ თავიანთი გეოლოგები, ისინი ყველაგნ მივლენ და მოიკვლევენ, მაგრამ ამას დრო სჭირდება. ამიტომ არ შეიძლება, რომ ამ საკთხზე ყოველ კვირაში მირეკოთ".

გამგებლის დავალების შესახებ, ასპინძაში წყალმომარაგების კომპანიის ხელმძღვანელმა მალხაზ ბალიაშვილმა არაფერი იცის: "ახლა ოთის წყლების სათავე–ნაგებობას ვრეცხავთ და დეზინფექციას ვუტარებთ, ეგ დავალება ჯერ არ ვიცი, ცენტრს მიმართეთ, იმათ ეცოდინებათ".

"საქართველოს გაერთიანებული წყალმომარაგების კომპანიის" სამცხე–ჯავახეთის რეგიონული ფილიალის მენეჯერი ბორის სპანდერაშვილი კი ამბობს, რომ გამგებლის დავალების შესახებ მისთვის ცნობილია, თუმცა კომპანიას მხოლოდ ალტერნატიული წყლის მოძიება შეუძლია:
"ჩვენ, მიზეზებს თუ რატომ შეუწყდა რუსთავს წყლის მიწოდება, ვერ დავადგენთ. ეს ასპინძის გამგეობის მოვალეობაა".

გამგებელი კი ირწმუნება, რომ მოსახლეობის განცხადება იმის შესახებ, თითქოს სოფელში წყალი არ არის, სიცრუეა: "სინამდვილეში, განრიგი შეიცვალა და 24 საათიანი მომარაგების ნაცვლად, დღეში რამდენიმე საათი მიეწოდებათ. ამასწინად, ერთი ქალი მომადგა 800 ძირი ბულგარული წიწაკა დავრგე იმ იმედით, რომ წყალი მექნებოდაო. მაგათ ნათესების მორწყვა უნდათ და ეგ აწუხებთ, თორემ სასმელი წყალი ნამდვილად აქვთ".

[ლუბა გიორგაძე, ასპინძა]