გენდერული დისკუსია აგარის თემში

ცენტრში შეკრებილებს ქალთა პოლიტიკაში ჩართულობის მნიშვნელობაზე თვითმმართველი თემის ახალციხის მუნიციპალიტეტის საკრებულოს დეპუტატი, მარინე სუდაძე ესაუბრა.

ადგილობრივები დაახლოებით ორი საათის განმავლობაში მსჯელობდნენ, რატომ არის მნიშვნელოვანი ქალების ჩართულობა პოლიტიკაში, რატომ არიან ქალები პასიურები, როგორია მამაკაცების და ზოგადად, საზოგადოების დამოკიდებულება, რამდენად მყარია სტერეოტიპი – პოლიტიკა რა ქალის საქმეა, რაც ბევრ ქალს ხელს უშლის საზოგადოებრივ ასპარეზზე გამოჩენაში.

მარინე სუდაძე მისი პრაქტიკიდან იმ შემთხვევებს იხსენებდა, როდესაც მისი, როგორ ქალი პოლიტიკოსის იდეა ჩავარდა, იმიტომ, რომ ნაკლებად პრიორიტეტული იყო მამაკაცების გადასახედიდან და საკრებულოს უმცირესობაში მყოფმა ქალებმა იდეა ვერ გაიტანეს.

„მაგალითად მინდოდა ახალციხის ბიუჯეტში ჩასმულიყო ერთჯერადი დახმარების პროგრამა მარტოხელა დედებისთვის, მაგრამ სხდომაზე ეს საკითხი ვერ გავიტანე, იმიტომ, რომ კაცებმა არ დამიჭირეს მხარი. 7 ქალი 23 მამაკაცის წინააღმდეგ – დაახლოებით ასე გადანაწილდა ხმები. მინიმუმ, ამისთვის გვჭირდება ქალები პოლიტიკაში“– ამბობს ახალციხის საკრებულოს დეპუტატი მარინე სუდაძე, რომელიც წლებია პოლიტიკაში აქტიურადაა ჩართული.

ქალების პასიურობას რამდენიმე მიზეზით ხსნიდნენ შეხვედრის მონაწილე ქალები და მამაკაცები.

„ქალებს თავადაც აქვთ ჩაკეტილობა, ფიქრობენ, რომ მაინც ისე იქნება ყველაფერი, როგორც კაცები იტყვიან, ამიტომაც არიან ხშირად პასიურები“, – განაცხადა დისკუსიის ერთ–ერთმა მონაწილე ქალმა.

„არის ქალების კატეგორია, მამაკაცებზე უკეთ გაართმევენ თავს, მაგრამ ქალების უმეტესობას მაინც არ შეუძლია იმის გაკეთება, რასაც მაგალითად კაცი გააკეთებს. სიტყვაზე, სოფელში მილი რომ გასკდება, ქალი ვერ ირბენს მთაში“, – ასე გვპასუხობს ერთ–ერთი საყუნეთელი ახალგაზრდა კაცი, კითხვაზე, რატომ არ შეიძლება მაგალიტად სოფელში გამგებლის წარმომადგენელი, ან მისი თანაშემწე ქალი იყოს, – „მაგრამ, აწყურში მაგალითად თანაშემწე ქალია და ბევრ რამესაც აკეთებს“, – ამატებს თავადვე.

აგარის თემში შეხვედრა გაიმართა პროექტის ფარგლებში "თანასწორობა იგებს“ , რომელსაც არასამთავრობო ორგანიზაცია ,ჟურნალისტთა ქსელი გენდერული თანასწორობისათვის“ ამერიკის შეერთებული შტატების საერთაშორისო განვითარების სააგენტოსა ( USAID) და საარჩევნო სისტემების საერთაშორისო ფონდის (IFES) მხარდაჭერით ახორციელებს.

„ამ სოფელში განებივრებული არ ვართ ასეთ თემებზე დისკუსიებით, ამიტომაა, რომ კაცებს და ქალებსაც, უჭირთ გენდერული თანასწორობის გაგება და ეს სიტყვა აშინებთ, ჰგონიათ, რომ კაცების ჩაგვრაა“, – გვითხრა შეხვედრის დასასრულს საყუნეთის ახალგაზრდული ცენტრის მენეჯერმა სოფო ბერიძემ.



[Sknews.ge]