დისკუსია ახალციხეში ქალი ამომრჩევლების საჭიროებების შესახებ

შეხვედრა, ახალციხის დემოკრატიული ჩართულობის ცენტრში, ორგანიზაციის "ჟურნალისტთა ქსელი გენდერული თანასწორობისთვის" ორგანიზებით შედგა.

დისკუსიას ახალციხეში მოქმედი პოლიტიკური პარტიების წევრები, დეპუტატობის კანდიდატები, ქალი პოლიტიკოსები, ასევე, ახალციხეში მოქმედი არასამთავრობო ორგანიზაციების წევრები ესწრებოდნენ.

შეხვედრის დასაწყისში, დამსწრეებს ჟურნალისტთა ქსელის მიერ, პროექტის, – „დაუჭირე მხარი ქალთა პოლიტიკაში ჩართულობას" ფარგლებში, შემუშავებული მანიფესტი გააცნეს. მანიფესტი, არჩევნებში ძალადობისა და დისკრიმინაციის დაუშვებლობას ეხება და მისი ადრესატები პოლიტიკური პარტიები, ხელისუფლება, მერობის და საკრებულოს წევრობის კანდიდატები, მოსახლეობა და მედიის წარმომადგენლები არიან.

"ძალიან მოხარული ვარ, რომ როგორც იქნა, ვიღაც დაფიქრდა ქალი კანდიდატების მიმართ დისკრიმინაციაზე და განსაკუთრებით მნიშვნელოვანია, რომ ეს მანიფესტი არის მედიის მისამართითაც", – განაცხადა ტექსტის გაცნობის შემდეგ "ქართული ოცნების" წევრმა, ქალაქ ახალციხის საკრებულოს თავმჯდომარემ თამარ გოგოლაძემ, რომელიც წლებია პოლიტიკაშია.

იგი თავდაპირველად "რესპუბლიკური" პარტიის წევრი იყო, – პარტიის ახალციხის ორგანიზაციის თავმჯდომარე და როგორც დისკუსიაზე გაიხსენა, არაერთხელ გამხდარა გენდერული დისკრიმინაციის მსხვერპლი.

მანიფესტის გაცნობის შემდეგ, შეხვედრის მონაწილეებს ჟურნალისტთა ქსელის მიერ, ქალი ამომრჩევლების საჭიროებებზე ჩატარებული კვლევის შედეგები გააცნეს. კვლევა ქალაქ ახალციხესა და ახალციხის სოფლებში, თავშეყრის ადგილებში, ე.წ. ბირჟებზე, სოფლის ცენტრებში ტარდებოდა და მასში უმეტესად საშუალო ასაკის ქალები მონაწილეობდენ. გარდა ამისა, ქალი ამომრჩევლების საჭიროებების გამოვლენის მიზნით, ორგანიზაცია ხვდებოდა ახალციხეში მოქმედ არასამთავრობო ორგანიზაციებს, ასევე, ანგარიშშიც და კვლევის პერიოდშიც, ცალკე ყურადღება დაეთმო ეთნიკური უმცირესოების წარმომადგენელ ქალებსა და შშმ პირთა მშობლებს. როგორც ახალციხეში მოქმედ შშმ პირთა მშობლების ორგანიზაციაში "თანადგომა შვილებს" ამბობენ, ახალციხეში (ქალაქშიც და თემში) 196 ოჯახი ცხოვრობს, რომელშიც სპეციალური საჭიროების წევრია და ამ ადამიანების მოვლის ტვირთი უმეტესწილად ქალებზეა, შესაბამისად, განსხვავებული და მრავალია ასეთი ამომრჩეველი ქალების საჭიროებები.

კვლევის შედეგების გარდა, პრეზენტაცია პოლიტიკური პარტიების მისამართით რეკომენდაციებსაც შეიცავდა. მათ შორის იყო, პარტიების პროგრამებში ქალთა საჭიროებების ასახვა და ზოგადად, პროგრამების დაყვანა ამომრჩევლამდე.

პრეზენტაციის შემდეგ, შეხვედრა დისკუსიის რეჟიმში გაგრძელდა. პოლიტიკურმა პარტიებმა რეკომენდაცია, რომელიც პარტიების პროგრამების ზოგადობას შეეხებოდა, არ გაიზიარეს, იმ მოტივით, რომ ქვეყანაში არაერთი პრობლემაა და პროგრამის ასე დეტალურად ჩაშლა, ფაქტობრივად შეუძლებელია.

რაც შეეხება ამომრჩეველ ქალებთან ნაკლებად მუშაობას, პოლიტიკოსებმა ეს იმით ახსნეს, რომ ქალები პარტიულ შეხვედრებს, მითუმეტეს თუ ამ შეხვედრას ოპოზიციური პარტია მართავს, ძალიან ერიდებიან. მათ ქსელს სთხოვეს, მან გაუკეთოს ორგანიზება მსგავს შეხვედრებს, რომელსაც სიამოვნებით დაესწრებიან.

ქალი ამომრჩევლების პასიურობასა და ზოგადად, პოლიტიკაში ქალების ნაკლებად ჩართულობას, შეხვედრის მონაწილეთა უმეტესობა ქვეყანაში არსებული მძიმე სოციალურ–ეკონომიკური ფონით ხსნიდა. საუბარი შეეხო საზოგადოებაში ღრმად გამჯდარ გენდერულ სტერეოტიპებს: "პოლიტიკა ბინძურია", ან კიდევ, "პოლიტიკა რა ქალის საქმეა".

ქალმა პოლიტიკოსებმა თავიანთი პრაქტიკიდან ის მაგალითები გაიხსენეს, რაც მათ, როგორც ქალ პოლიტიკოსებს, კარიერის გზაზე ბარიერებს უქმნიდა და განაცხადეს, რომ პოლიტიკაში პრობლემები ქალებსაც აქვთ და კაცებსაც, მაგრამ, ქალებისთვის ეს გზა განსაკუთრებით რთული და სპეციფიურია.

მიუხედავად ქალი ამომრჩევლებისა და ქალი პოლიტიკოსების პასიურობისა, შეხვედრის მონაწილეებმა აღნიშნეს, რომ ტენდენცია, ქალების პოლიტიკაში ჩართულობის მაინც დამაიმედებელია, რადგან ბოლო წლებში ამ კუთხით გარკვეული სასიკეთო ცვლილებები არის და ნელ–ნელა საზოგადოების დამოკიდებულებაც იცვლება.

დისკუსია არასამთავრობო ორგანიზაციამ, „ჟურნალისტთა ქსელი გენდერული თანასწორობისათვის“, აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში გამართა. პროექტი: „დაუჭირე მხარი ქალთა პოლიტიკაში ჩართულობას", რომლის სლოგანია, – “ქალის ხმა არჩევნებში!“, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით ხორციელდება.







[ნინო ნარიმანიშვილი, ახალციხე]