შესწორება: 22 აგვისტოს წყალთბილაში ხანძარი არ ყოფილა

დღეს, 22 აგვისტოს, "სამხრეთის კარიბჭემ" გამოაქვეყნა ინფორმაცია, რომელშიც საუბარი იყო, რომ ახალციხეში, სოფელ წყალთბილაში დაახლოებით 16:00 საათზე მინდორს ცეცხლი მოედო. ხანძრის შესახებ რედაქციაში რამდენიმე მოქალაქის ზარი შემოვიდა. ინფორმაცია არ დაადასტურა გამგებლის წარმომადგენელმა სოფელში, თუმცა, საგანგებო სიტუაციების მართვის სააგენტოში გვიტხრეს, რომ წყალთბილაში ნამდვილად იყო ხანძარი და ადგილზე 15–მდე მეხანძრე მუშაობდა.

„დაახლოებით 100 კვადრატული მეტრი იწვის, ხანძრის გავრცელების საშიშროება არ არსებობს, მალე მოხდება მისი ლიკვიდირება“, – გვითხრეს საგანგებო სიტუაციების მართვის სააგენტოს საზოგადოებასთან ურთიერთობის სამსახურში.

მასალის გამოქვეყნების შემდეგ, "სამხრეთის კარიბჭეს" ახალციხის გამგეობიდან დაუკავშირდნენ და ასევე განაცხადეს, რომ სოფელში ხანძარი არ ყოფილა. ამის შემდეგ, საგანგებო სიტუაციების სამსახურს კიდევ ერთხელ (დღის განმავლობაში ალბათ მეხუთედ) დავუკავშირდით და აღმოჩნდა, რომ ეს სამსახურც შეცდომაში შეიყვანეს მათ, ვინც ინფორმაცია ადგილზე გადაამოწმა: "რეგიონში მძიმე ვითარებაა, ჩვენც საშინელ რეჟიმში ვმუშაობთ და უზუსტობა გაიპარა".

"სამხრეთის კარიბჭე" ბოდიშს უხდის მკითხველს არაზუსტი ინფორმაციის გავრცელებისთვის, თუმცა, ჩვენი ინფორმაცია იყო გადამოწმებული და ეყრდნობოდა რამდენიმე წყაროს. როგორც შესწორების სტანდარტი გვავალდებულებს, ძველი ინფორმაცია ვებგვერდზე აღარ იძებნება.

[ნინო ნარიმანიშვილი, ახალციხე]