მეხმა ვალეში ტექნიკა გადაწვა

ვალეში 4 აგვისტოს ძლიერი ჭექა–ქუხილის შემდეგ სტალინის ქუჩაზე მცხოვრებლებს ტექნიკა გადაეწვათ. როგორც ადგილობრივები ამბობენ, ამ დღეს, N6-დან N14–ის ჩათვლით, ტექნიკა ყველა ოჯახში დაიწვა.

„ახალი ნაყიდი 800–ლარიანი პლაზმური ტელევიზორი გადამეწვა. ახალციხეში ვერ გამიკეთეს, არ ვიცი თბილისში გააკეთებენ თუ არა.
ჩემნაირი ტელევიზორი დაეწვა მეზობელს, 1200–ლარიანი და ვერც ის აკეთებს“, – ამბობს სტალინის N12-ში მცხოვრები კობა სუდაძე.

სუდაძისგან განსხვავებით მის მეზობლად მცხოვრებ ნათენაძეებს ტელევიზორი გადაურჩათ, თუმცა, მის გარდა სახლში თითქმის ყველაფერი გადაიწვა.

„სეთთოფბოქსი, ვაი–ფაის მოდემი, წყლის გამაცხელებელი და სატელიტური ანტენის მიმღები გადამეწვა. ჩემს გარშემო მეზობლებს კი კომპიუტერები და სხვა ტექნიკაც გაუფუჭდათ“, – აცხადებს ჯაბა ნათენაძე.

მომხდარიდან მალევე მან „ენერგო–პრო–ჯორჯიაში“ დარეკა: „მოვიდა კომპანიის წარმომადგენელი და ვითარებას გაეცნო. თუმცა, ვუთხარით, რომ მათთან პრეტენზია არ გვქონდა, რადგან ტექნიკა რეალურად სტიქიის გამო დაიწვა“.

სტალინის ქუჩაზე მცხოვრებლებმა ის, რომ „ენერგო–პრო–ჯორჯიასთან“ პრეტენზია არ აქვთ, დღეს, 7 აგვისტოს კომპანიას ხელმოწერითაც დაუდასტურეს.

როგორც „ენერგო–პრო–ჯორჯიაში“ აცხადებენ, სტიქიას კომპანიის ქსელი არ დაუზიანებია: „04 კილოვოლტის ძაბვის გადამცემ ხაზს დაეცა მეხი და ტექნიკა ამის გამო დაზიანდა, მაგრამ ეს ჩვენი ქსელი არ არის“.

ადგილობრივები დახმარებას ახალციხის მუნიციპალიტეტის გამგეობას სთხოვენ.

„სეტყვისა და წყალდიდობის გამო ხომ სწავლობენ ადგილზე ვითარებას, შემდეგ ხალხს ეხმარებიან, რატომ არ შეიძლება, რომ მომხდარიც ახლაც დაინტერესდნენ და მოქალაქეებს გვერდში დაუდგნენ?!“, – კითხულობს ნათენაძე.

ადგილობრივ ხელისუფლებას სთხოვს დახმარებას კობა სუდაძეც: „ეს სტიქია იყო, სტიქიის გამო დავზიანდით, ამიტომ უნდა დაეხმაროს გამგეობა ხალხს“.

ვალეში გამგებლის წარმომადგენელი ელიოზ ბარბლიშვილი აცხადებს, რომ მისთვის დახმარების თხოვნით არავის მიუმართავს.
მსგავსი განცხადება არც ახალციხის მუნიციპალიტეტის გამგეობაში შესულა.

„მასშტაბიდან გამომდინარე ეს სტიქიურ უბედურებაშიც არ გადის“, – აცხადებენ ახალციხის მუნიციპალიტეტის გამგეობაში და ამატბენ, რომ აქედან გამომდინარე მიმართვის შემთხვევაშიც ვერავსი დაეხმარებოდნენ.

[თამუნა უჩიძე, ახალციხე]