'ენერგო–პრო' ვალეში დამწვარ ტექნიკაზე: ადგილობრივები კომპენსაციას არ ითხოვენ

ვალეში, ძლიერი ძაბვის შედეგად ცხრა ოჯახი დაზარალდა, მას შემდეგ თვეზე მეტი გავიდა, თუმცა ამ დრომდე არცერთ მათგანს „ენერგო–პრო–ჯორჯიასგან“ კომპენსაცია არ მიუღია.

კომპანიაში აცხადებენ, მათთან მხოლოდ ერთი აბონენტის განცხადებაა შესული, თუმცა მასაც საბუთები აკლია, დანარჩენ რვას კი კომენსაციის მოთხოვნით არ მიუმართავთ.

„აღირებული გვაქვს, რომ აქ ტექნიკა ჩვენს გამო გადაიწვა. ამიტომ "ენერგო–პროს" წარმომადგენელი იყო მისული და შესთავაზა, რომ თუ მათ სურდათ, გაფუჭებულ ტექნიკას ჩვენ გავუკეთებდით, მაგრამ არც იმას ითხოვენ, რომ ჩვენ გავუკეთოთ და არც კომპენსაციას. ამ დრომდე არაფერია შემოსული“, – აცხადებენ „ენერგო–პრო–ჯორჯიას“ საზოგადოებასთან ურთიერთობის სამსახურში.

მათივე განმარტებით, თუ აბონენტები შესაბამის დოკუმენტებს, მიმართვას და შეკეთებული ტექნიკის ქვითარს წარმოადგენენ, თანხა ანგარიშეზე დაერიცხებათ.

„ახლა კიდევ გაიგზავნება უსაფრთხოების სამსახურის უფროსი ვალეში, რომ გაერკვეს რატომ არ ითხოვს ეს ხალხი კომპენსაციას. ეს იმისთვის, რომ შემდეგში არ გართულდეს რაიმე, იმ მოტივით რომ თითქოს ჩვენი მხრიდან იყო უყურადღებობა“.

აშოტ სტეფანიანი, რომელსაც ძლიერმა ძაბვამ მაცივარი და პერსონალური კომპიუტერი გადაუწვა, აცხადებს, რომ კომპანიას კომპენსაციის მიღების მოთხოვნით დიდი ხნის წინ მიმართა: „მოვიდნენ ფოტოები გადაიღეს, მაგრამ იმის მერე არავინ გამოჩენილა. მარტო მაცივრის შეკეთება 200 ლარი დამიჯდა. კომპიუტერის გასაკეთებლად კი ფული არ მაქვს“.

სტეფანიანი ამბობს, რომ „ენერგო–პროში“ მაცივრის შეკეთების ქვითარი არ წარუდგენია: „კერძო ხელოსანია და არ აქვს იმას საკასო. არც არავის უთქვამს, რომ ფულს იმიტომ არ გაძლევთ ჩეკი რომ არ მოიტანეო“.

სტეფანიანი ირწმუნება, რომ კომპანიას კომპენსაციის მოთხოვნით მისმა მეზობლებამც მიმართეს: „იმათმა ჩემზე ადრე დაწერეს განცხადებები, მაგრამ ამ დრომდე არავის არაფერი მიუღია“.

შეგახსენებთ, რომ ვალეში მაღალი ძაბვის გამო ადგილობრივებს ელექტროტექნიკა 23 მაისს დაეწვათ.

[თამუნა უჩიძე, ახალციხე]