წაღვერის ტყეში ხანძარი ჩააქრეს, თუმცა, ტექნიკა ადგილზე რჩება

საგანგებო სიტუაციების მართვის სააგენტოში ამბობენ, რომ მათი თანამშრომლები წაღვერის ტყეში, პრევენციის მიზნით, ჯერ ისევ მუშაობენ.
„ღია ხანძარი აღარსად გვაქვს. ცეცხლი, ფაქტობრივად, ყველგან ჩამქრალია, მაგრამ ჩვენი მეხანძრე–მაშველები და მათ შორის ვერტმფრენიც მუშაობს იმისთვის, რომ დავრწმუნდეთ ხანძრის ხელახლა გაჩენის საშიშროება აღარ არის და არსად არანაირი კერა არ არის დარჩენილი. მხოლოდ ამის შემდეგ ცხადდება ხოლმე ხანძრის ლიკვიდაცია“, – განმარტავენ სააგენტოში.

ბორჯომის მუნიციპლაიტეტის გამგებლის მოადგილე, ანზორ სვანიძე განმარტავს, რომ ტექნიკის საჭიროება აღარაა: „ადგილზე ტექნიკა აღარ მუშაობს, მაგრამ, როგორც ჩვენ ვიცით, 5 საათამდე წაღვერში დარჩება ვერტმფრენი, ყოველი შემთხვევისათვის“.

რაც შეეხება დამწვარ ფართობს, საგანგებო სიტუაციების მართვის სააგენტოში ამბობენ, რომ დამწვარია 5 ჰექტარი ტყის მასივი, თუმცა გამგებლის მოადგილე „სამხრეთის კარიბჭესთან“ განმარტავს, რომ დამწვარი ტერიტორია 2.5 ჰექტარია: „კერები იყო სხვადასხვა ტერიტორიაზე გავრცელებული, მაგრამ ,მაქსიმუმი არის 2.5 ჰა, რომელიც დაზარალდა და დაიწვა“.

შეგახსენებთ, რომ წაღვერში, არჯევანის ტყეში, ხანძარი გუშინ, 26 ივლისს, დილით გაჩნდა. ცეცხლის ჩაქრობის სამუშაოებში 100-ზე მეტი მეხანძრე იყო ჩართული, როგორც ადგილობრივი, ისე დამატებითი ჯგუფები სხვადასხვა რეგიონებიდან. ხანძრის ჩაქრობის პროცესს ქარი და რთული რელიეფი ართულებდა.

შსს–ს ინფორმაციით, მომხდარზე მიმდინარეობს გამოძიება სისხლის სამართლის კოდექსის 187–ე მუხლით, რაც ნივთის დაზიანებას ან განადგურებას გულისხმობს.

[sknews.ge]