ხანძრის ერთი კერა სამცხე–ჯავახეთში–27 სექტემბერი

საგანგებო სიტუაციების მართვის სამსახურის ინფორმაციით, ასპინძა–ბორჯომის მონაკვეთზე, კოდიანის ტყეში ღია ცეცხლი აღარ არის და არც დაკვამლიანება შეინიშნება, ადგილზე სალიკვიდაციო სამუშაოები მიმდინარეობს. ისევ მობილიზებულია 200–ზე მეტი ცოცხალი ძალა და სასაზღვრო პოლიციის ვერტმფრენი მუშაობს.

რაც შეეხება ბორჯომს, წაღვერის ტყეში ხანძრის სრული ლიკვიდირება დღეს, 27 სექტემბერს მოხერხდა. ადგილზე პრევენციის მიზნით მეტყევეები და მეხანძრე–მაშველები რჩებიან.

ხანძარი სრულად არის ლიკვიდირებული ადიგენში, ღაღვის ტყეშიც. როგორც წაღვერში აქაც პრევენციის მიზნით მეხანძრე–მაშველები რჩებიან.

დღესვე საქართველო დატოვეს აზერბაიჯანულმა და თურქულმა ვერტმფრენებმა.

შეგახსენებთ, რომ ცეცხლის ქრობისა და სალიკვიდაციო სამუშაოები წაღვერისა და ღაღვის ტყეში შვიდი დღის განმავლობაში მიმდინარეობდა. ხოლო კოდიანის ტყეში ხანძარს მეექვსე დღეა ებრძვიან.

[ლუბა გიორგაძე, ბორჯომი]