აბასთუმანში ოთხვარსკვლავიანი სასტუმრო აშენდება

საპარტნიორო ფონდის აღმასრულებელმა დირექტორმა ირაკლი კოვზანაძემ განაცხადა, რომ სამცხე–ჯავახეთში ფონდმა ორი პროექტი უკვე დაასრულა. იანვარში ლიკანში რიქსოსის ხუთვარსკვლავიანი სასტუმრო გაიხსნა, მანამდე კი იყო რაბათის სასტუმრო ჯინო–ველნესი.

„მომავალში ვგეგმავთ აბასთუმანში ოთხვარსკვლავიანი სასტუმროს გახსნას. ეს ის რაიონია, სადაც ქართველ და უცხოელ დამსვენებლებს ყოველთვის მოუხარიათ, ამიტომ ვფიქრობთ, რომ სასტუმრო საჭიროა“, – განმარტავს ირაკლი კოვზანაძე.

მისი თქმით, წლის პირველ ნახევარში პროექტირება და მოსამზადებელი სამუშაოები იგეგმება, წლის მეორე ნახევარში კი მნიშვნელოვანი შედეგები იქნება.

„გარდა ამისა, გვაქვს სპეციალური კვლევა შეკვეთილი ამ რეგიონში სამშენებლო მასალის წარმოებასთან დაკავშირებით და ვფიქრობთ, რომ ხუთამდე პროექტი გამოიკვეთება. ასევე ჩვენ მზად ვართ, ადგილობრივ და უცხოელ ბიზნესმენებთან, რომლებიც აქ ინვესტიციებს მოისურვებენ, 50 პროცენტამდე კაპიტალში მონაწილეობა მივიღოთ“, – ამბობს საპარტნიორო ფონდის აღმასრულებელი დირექტორი.

[თამარ თოთაძე, ახალციხე]