მესხურ ყველ 'ტენილს' არამატერიალური კულტურული მემკვიდრეობის ძეგლის სტატუსი მიენიჭა

საქართველოს კულტურისა და ძეგლთა დაცვის მინისტრის, გურამ ოდიშარიას № 03/207 ბრძანებით, არამატერიალური კულტურული მემკვიდრეობის ძეგლის სტატუსი ასევე მიენიჭა ცეკვა ხორუმსა და საბავშვო ჟურნალ "დილას".

"საქართველოს უმნიშვნელოვანესი ისტორიულ-კულტურული ფასეულობის სამართლებრივი დაცვის უზრუნველყოფის მიზნით, „საქართველოს ზოგადი ადმინისტრაციული კოდექსის" 51-ე, 52-ე, 53-ე მუხლებისა და „კულტურული მემკვიდრეობის შესახებ" საქართველოს კანონის მე-15 მუხლის მე-3პუნქტის შესაბამისად, ვბრძანებ:
1. მიენიჭოს არამატერიალური კულტურული მემკვიდრეობის ძეგლის სტატუსი:
ა) საბავშვო ლიტერატურული ჟურნალის ტრადიციას – ჟურნალი "დილა";
ბ) ცეკვა "ხორუმს";
გ) მესხური ყველი „ტენილის“ დამზადების ტექნოლოგიას", - ნათქვამია საქართველოს კულტურისა და ძეგლთა დაცვის მინისტრის, გურამ ოდიშარიას ბრძანებაში, რომელიც 13 ნოემბერსაა გამოცემული. ბრძანება საკანონმდებლო მაცნეში დღეს გამოქვეყნდა.

შეგახსენებთ, ერთდაერთი საწარმო საქართველოში, სადაც ტენილ ყველს ამზადებენ, ასპინძის მუნიციპალიტეტის სოფელ ჭობარეთში სამი წლის წინ გაიხსნა. საწარმოს „მზიანეთი“ ჰქვია, ამიტომ ტენილი ყველი ბაზარზე „მზიანეთის“ სახელით გადის.

[SKnews.ge]