“რიგში დგომით ყველაფერი დახმა“ – სარწყავი წყლის პრობლემა ჭაჭარაქში

სოფელ ჭაჭარაქში რწყვის სეზონი ერთი თვეა დაიწყო, თუმცა როგორც ადგილობრივები ამბობენ, მათ უმეტესობას ნაკვეთები ჯერაც არ მოურწყავს.

„ჯერ არ მომირწყვია, რიგს ველოდები, ახლაც საქაჩზე მივდივარ, რომ გავიგო როდის შევძლებ კარტოფილის მორწყვას. რიგში დგომით ყველაფერი ჩამიხმა, ახლა მაგას რა წყალი უშველის არ ვიცი. ვერ გვამარაგეს საქაჩი ყველას“, – გვეუბნება ჭაჭარაქელი სერგო აღაბაბიანი.
რიგში დგომით, რომ მოსავალი ხმება, ამაზე ჭაჭარაქში სხვებიც საუბრობენ, თუმცა აქ პრობლემა მხოლოდ წყლის სიმცირე როდია.

ადგილობრივები ამბობენ, რომ წელს სატუმბ სადგურზე ტარიფმაც მოიმატა, აქმდე თუ ერთ საათში 60 ლარს იხდიდნენ, წელს 65 ლარი გახდა.

„ძალიან ძვირი! იმის გამო, რომ ნათესებს დროულადაც ვერ ვრწყავთ რაღაც შეღავათი გაგვიწიონ, უარესს აკეთებენ, ფასს ზრდიან“, – ამბობს ადგილობრივი დიმიტრი ვირაბიანი.
წყალსაქაჩი რომ ნაკვეთების დროულ გასარწყავიანებას ვერ ახერხებს, ამასჭაჭარაქის სატუმბი სადგურის ხელმძღვანელი არამ ელბაქიანიც ადასტურებს: „გვალვებია, წყალი ყველას ერთდროულად უნდა, ეგრე კიდევ არ გამოდის. ვიცი რომ ვერ ასწრებენ მაგრამ წყალი საკმარისია, სატუმბიც კარგად მუშაობს, უბრალოდ ამაზე მეტის მიწოდება ფიზიკურად შეუძლებელია, სატუმბს ვერ გადავწვავთ“.

იგივე მიზეზს ასახელებს ახალციხის სამელიორაციო სამსახურის უფროსი ჯემალ გიორგაძეც: „მორწყვის პერიოდი რომ დაიწყო რამდენიმე კვირა გაჩერებული იყო საქაჩი არავის ახსენდებოდა მოერწყო, ახლა ყველას ერთდროულად მოუნდაა და დროში ვერ ეტევიან. სატუმბს არანაირი პრობლემა არ აქვს, ის გამართულად მუშაობს. რაც შეეხება წყლის ოდენობას, საკმარისი წყალი რომ არ იყოს, საქაჩი ვერ იმუშავებდა“.

რაც შეეხება გაზრდილ ტარიფს, გიორგაძე ამბობს, რომ ეს ელექტროენერგიის საფასურის ზრდამ გამოიწვია: „2015 წლიდან ელექტროენერგის საფასური რომ გაიზარდა 4 თეთრით, 2016 წელს სარწყავზე ფასი მაინც იგივე დავტოვეთ. თუმცა, სეზონის დასრულების შემდეგ აღმოჩნდა, რომ მელიორაციის სამსახურმა დიდი ზარალი მიიღო და ვალები დაუგროვდა. მისი გასტუმრება გამგეობას მოუხდა. ამიტომ გადავწყვიტეთ წელს, რომ ფასი მოგვემატებინა“.

მისივე თქმით, ახალციხეში ფასის ზრდა ყველა სატუმბ სადგურს შეეხო.

სატუმბი სადგური, რომელიც სოფელ ჭაჭარაქში მდებარეობას წყლით ურავლის წყლებიდან მარაგდება და ორ სოფელს მინაძე– ჭაჭარაქს ემსახურება. როგორც სატუმბი სადგურის ხელმძღვანელი ამბობს, სეზონზე საქაჩი 50 ჰექტრამდე ნაკვეთს ასარწყავიანებს. ამ სოფლებში რწყვის სეზონი ივნისის შუა რიცხვებიდან იწყება და აგვისტოს 20 –ამდე გრძელდება.

[ლუბა გიორგაძე, ახალციხე]