სოფელ ჭაჭარაქში ნაკვეთებს ვერ რწყავენ

ჭაჭარაქში სარწყავი ქსელი ახლა ეწყობა

ჭაჭარაქელები ახალი სარწყავი სისტემის მონტაჟს ერთი თვეა ელოდებიან. ამბობენ, რომ სამელიორაციო სამსახურმა სამუშაოები რწყვის სეზონზე, მაისის ბოლოს დაიწყო და სისტემის რეაბილიტაციის გამო ნაკვეთები მოსარწყავი დარჩათ.

„ყველაფერი გახმა. მაისის ბოლოს უნდა დაწყებულიყო მორწყვა, ჯერ ერთხელაც არ მოგვირწყავს“, -გვეუბნება სოფელ ჭაჭარაქში მცხოვრები მკრტიჩ ელბაქიანი.

ადგილობრივებმა არც ის იციან, ჭაჭარაქში სარწყავი სისტემის რეაბილიტაცია როდის დასრულდება, რომ ნათესების მორწყვა შეძლონ.
„ხალხს ატყუებენ, ყოველ დღე გვეუბნებიან ორ დღეში იქნებაო და გავიდა თვე“, - ამბობს გრიგორ ოგანესიანი.

ჭაჭარაქელები ამბობენ, რომ სარწყავი სისტემის ქსელი ძველი მილებით კეთდება და არ არის გამორიცხული სისტემა მალე ისევ დაზიანდეს.
„მეორად მილებს ყრიან მიწაში, რა იცი როდის გაფუჭდება კიდევ“, - ამბობს ადგილობრივი ვარდენ მინასიანი.

ჯიმშერ გოგოლაური, „გაერთიანებული დემოკრატიული მოძრაობის“ რეგიონული კოორდინატორი, რომელსაც ჭაჭარაქში მიწის ნაკვეთი აქვს, ამბობს, რომ ზოგ კულტურას დაგვიანებული მორწყვა აღარ უშველის: „სარწყავი არხები მზდ ერთი თვის უკან უნდა ყოფილიყო, მაგრამ სისტემის რეაბილიტაციას ალბათ ორი კვირა კიდევ მოუნდება. მერე კარტოფილის მორწყვას აზრი აღარ ექნება, სულ ჩახმება“.

ახალციხის მუნიციპალიტეტის გამგეობაში ირწმუნებიან, რომ ჭაჭარაქის მოსახლეობას სარწყავის სისტემით სარგებლობა ხვალიდან, 29 ივნისიდან, უკვე შეეძლება.

„წყალსაქაჩზე ყველა სამუშაო დავასრულეთ. ის მილები კი, რომელიც ახლა იყრება, იმისთვის არის, რომ სარწყავი წყალი ყველა ნაკვეთამდე მივიდეს და მაგის რეაბილიტაციასაც მალე დაასრულებენ“, - ამბობს, ა(ა)იპ „ახალციხის მელიორაციის” დირექტორი ჯემალ გიორგაძე.

გიორგაძე ადგილობრივებს ეთანხმება, რომ მორწყვა ნამდვილად დაგვიანდა, თუმცა, აქვე ამბობს, რომ მათი ჩივილი მისთვის გაუგებარია: „მე მოსახლეობას ველაპარაკე, ცოტა კი დაგვიანდა მორწყვა, მაგრამ ყველაფერი იცოდნენ და გარკვეულიც იყო“.

„ახალციხის მელიორაციის” დირექტორი ირწმუნება, რომ მეორადი მილებით შეკეთებული ქსელი მწყობრიდან არ გამოვა და ადგილობრივების შიში უსაფუძვლოა.

შეგახსენებთ, წელს პირველი შემთხვევა არ არის, როცა სოფელ ჭაჭარაქში ნაკვეთებს ვერ რწყავენ. იგივე პრობლემაზე ადგილობრივები შარშანაც წუხდნენ. თემაზე „სამხრეთის კარიბჭეს“ ვრცელი მასალაც აქვს მომზადებული, რომელშიც ადგილობრივ ხელისუფლებას მელიორაციის საკითხებისადმი მიდგომის შეცვლას ურჩევდნენ. თუმცა, როგორ ჩანს, გასული წლის გამოცდილებამ გაგმგეობას ვერაფერი ასწავლა.




[ლუბა გიორგაძე, ახალციხე]