ურავლის ხეობის ექვს სოფელს რწყვის პრობლემა აღარ ექნება

სარწყავი სისტემა სოფლებში: წყორძაში, ანდრიაწმინდაში, ახალშენში, მინაძეში, ღრელსა და ჭაჭარაქში მოეწყობა. პროექტი, რომლის ღირებულება 247, 298 ლარია, იაპონიის საელჩოსა და ახალციხის ადგილობრივი ბიუჯეტის დაფინანსებით ხორციელდება. 209, 575 ლარი იაპონიის საელჩოს წვლილია, 37 723 კი ახალციხის მერიის. შესაბამის ხელშეკრულებას ხელი დღეს, 30 მარტს, ახალციხის მერიაში მოეწერა.

პროექტის განხორციელების იდეა „მშვიდობის, დემოკრატიისა და განვითარების კავკასიურ ინსტიტუტს“ ეკუთვნის. პროექტის – „ადგილობრივი თემი და ხელისუფლება განვითარებისათვის“ ფარგლებში, რომლის მიზანი თემის განვითარების ხელშეწყობაა, ორგანიზაციამ ახალციხის სოფლების საჭიროებები შეისწავლა. კვლევების შედგად აღმოჩნდა, რომ ამ სოფლებს წლების განმავლობაში ნაკვეთების მორწყვის პრობლემა ჰქონდა.

„კავკასიურმა ინსტიტუტმა ახალციხის მუნიციპალიტეტის მერიასთან თანამშრომლობით მოამზადა საპროექტო განაცხადი, რომელიც წარუდგინა იაპონიის საელჩოს გამოცხადებული საგრანტო კონკურსის ფარგლებში. პროექტმა გაიმარჯვა და დაფინანსება საელჩოსგან მოიპოვა“,– განაცხადა პროექტის კოორდინატორმა თიკო ტყეშელაშვილმა.

სარწყავი სისტემის მშენებლობა გაზაფხულიდან დაიწყება და წლის ბოლომდე დასრულდება. პროექტის ავტორები ამბობენ, რომ თვითდინებით სისტემის გამო, მოსახლეობას რწყვის მინიმალური გადასახადი ექნება. პროექტის შედეგად დაახლოებიტ 287 ჰექტარი გასარწყავიანდება.



[მარიამ ბარძიმაძე, ახალციხე]