ახალციხეში, ზარზმელის ქუჩაზე სადარბაზოს ჭერი ჩამოინგრა

ზარზმელის N4 –ში, მეორე სადარბაზოში ჭერი, დაახლოებით, ერთი თვის წინ ჩამოინგრა.

„აღდგომის წინა პერიოდი იყო, ჭერი რომ ჩამოიშალა, მერიიდან მოვიდნენ, დაგვისუფთავეს და გვითხრეს აღდგომები რომ გავა გავაკეთებთო, მაგრამ აღარავინ გამოჩენილა“– ამბობს ადგილობრივი ტანია კრტიანი.

სადარბაზოში, რომელშიც ჭერი ჩამოინგრა ოთხი ოჯახი ცხოვრობს: „ბავშვები გვყავს ოთხივე ოჯახში, სულ ვცდილობთ, რომ პატარები მოვარიდოთ ამ ავარიულ სადარბაზოს, მაგრამ გარეთ გასვლა და შემოსვლა ხომ უნდათ. ასე როდემდე უნდა ვიყოთ?!“ – ამბობენ ზარზმელის ქუჩაზე მცხოვრებლები.

მათი თქმით, სადარბაზოს ჭერი იმიტომ ჩამოიშალა, რომ სახურავია დაზიანებული. ამის გამო ადგილობრივები გასულ წელსაც ჩიოდნენ, მაშინ ჭერიდან ბათქაში ცვიოდა: „დალპა მთელი შენობა, ზემოდან ცვივა ყველაფერი, ფრთხილად უნდა იარო, რომ თავში არაფერი დაგეცეს! ან თავზე „კასკა“ უნდა გეხუროს, სახლის კარებამდე რომ უსაფრთხოდ მიხვიდე“.




„სამხედრო ბინები“ თავდაცვის სამინისტროს ბალანსზეა. ამიტომ ახალციხის მერიაში აცხადებენ, რომ დაზიანებულ სადარბაზოს ვერ შეაკეთებენ. თავდაცვის სამინისტროში კი ამბობენ, რომ თუ ახალციხის მერია ბინების გადაცემის თაობაზე, ქონების მართვის სააგენტოს მიმართავს, სამინისტროში ამის შესახებ იმსჯელებენ.

„მოლაპარაკებები უკვე დავიწყეთ თავდაცვის სამინისტროსთან და როგორც კი ბინებს ბალანსზე გადმოგვცემენ იქ სახურავებსაც და სადარბაზოების ჭერსაც შევაკეთებთ“, – გვითხრეს ახალციხის მერიის საზოგადოებასთან ურთიერთობის სასმახურში.



ახალციხეში, ზარზმელის ქუჩაზე ორსართულიანი ბინები, 1950–იან წლებში, მეორე მსოფლიო ომის დასრულების შემდეგ აშენდა, რომელიც სამხედროებისათვის იყო განკუთვნილი. ახლა ამ ბინებში დაახლოებით 150–მდე ოჯახი ცხოვრობს.

[ლუბა გიორგაძე, ახალციხე]