დახმარების მოლოდინში

ახალციხის მუნიციპალიტეტის სოფელ ვალეში მცხოვრები დარბაიძეების ოჯახი ორი ათეული წელია ნახანძრალ ბინაში ცხოვრობს.

- “90-იან წლებში ელექტრო სადენების გამო მთელი სახლი გადაგვეწვა. სოფელი დაგვეხმარა, ფული აგვიგროვა, ტყიდან მასალა მოგვიტანა, მუშა ხელითაც მოგვეშველა, ლოგინი და ტანსაცმელიც მოგვცა”, - გვიამობს 50 წლის ლამარა დარბაიძე.

მაშინ დარბაიძეები სახელდახელოდ შეკეთებულ ბინაში გადავიდნენ და მას შემდეგ სახლში ვეღაც სახურავის, ვერც იატაკის და ვეღარც კედლების გამგრება შეძლეს. ღია კედლებში მზის სხივი და წვიმის წვეთები ერთნაირად ატანს. დარბაიძის თქმით, სახლშიც ისევე ქრის ქარი, როგორც გარეთ: “დამპალია იატაკი, ფუტუროდაა ქცეული. გვეშინია, არ ჩავვარდეთ”.

დარბაიძეებს იატაკი სახლში ერთხელ უკვე ჩაენგრათ.

- “დედამთილი გარდამეცვალა, სახლში თავი ბევრმა ხალხმა მოიყარა. მაშინ მეზობელი დათო ჩაჩანიძე სახლიდან სარდაფში ჩავარდა. კიდევ კარგი სარდაფში დიდი რაოდენობით კომბოსტო გვეყარა და რბილად დაეცა, ღმერთმა უბედურებისგან დაგვიფარა”, - ამბობს დიასახლისი.

დარბაიძეების ოჯახისთვის ერთადერთი შემოსავალი სოციალური დახმარება, 150 ლარია. უსახსრობის გამო საქონელს, ღორსა და ქათამს ვერ ინახავენ, ამიტომ მათი ძირითადი სარჩო შვიდ მეასედზე მოყვანილი მოსავალია.

- “საქონელს და ღორს ვერ ვყიდულობ, რომ ვიყიდო რა ვაჭამო?! მიწაც არ გვივარგა, ურწყავია, გასაყიდს ვერაფერს მოიყვან. რაც აქ მოდის, წლიდან წლამდე თავი ძლივს გაგვაქვს, - გვიხსნის ლამარა დარბაიძე და ამატებს, რომ მათი საჭმელი მხოლოდ კარტოფილი და კომბოსტოა, - ორი კილო ხორცი მხოლოდ სააღდგომოდ და საახალწლოდ თუ ვიყიდეთ, ხანდახან მაგასაც ვერ ვახერხებთ”.

მისი თქმით, რამდენიმე თვეა სოციალური დახმარებიდან აღებულ 150 ლარსაც კრედიტში იხდიან: “შვილიშვილმა იავადმყოფა, პოლისი გვაქვს, მაგრამ ყველაფერში ვერ ვიყენებთ, ამიტომ კრედიტით აღებული 1 800 ლარიდან 1000 ლარი მხოლოდ ნემსებსა და წამლებში დაგვჭირდა, დანარჩენი კი საგაზაფხულო სამუშაოებზე დავხარჯეთ”.

ლამარა დარბაიძემ ახალცხიის მუნიციპალიტეტის გამგეობას დახმარების თსოვნით არაერთხელ მიმართა: “ათუნაშვილი რომ იყო გამგებელი, მაშინაც ვიყავი და დემეტრაძესაც ვთხოვე დახმარება, მაგრამ დღემდე არაფრით დაგვეხმარნენ. ხის მასალა და სამი-ოთხი ტომარა “ალიბასტრი” რომ მაინც მოგვცენ, სახლს ცოტათი მაინც გავამაგრებთ”.

მისი თქმით, ახალციხის მუნიციპალიტეტის ყოფილმა გამგებელმა დათო ათუნაშვილმა, მათ ბილეთის გამოწერა და ტყიდან ხის გამოტანა შესთავაზა: “ტყიდან ხის გამოტანა რომ შეგვეძლოს სახლს ამ დონემდე ხომ არ მივიყვანდით?!”

რაც შეეხება დემეტრაძის რეაგირებას, დარბაიძის თხოვნა უპასუხოდ დარჩა.

ახალციხის მუნიციპალიტეტის საკრებულოს თავმჯდომარე მალხაზ გიქოშვილი დარწმუნებულია იმაში, რომ ადგილობრივი თვითმმართველობა დარბაიძეებს სამშენებლო მასალით აუცილებლად დაეხმარებოდა: “ეკონომიკისა და ინფრასტრუქტურის სამსახურში გეტყვიან რა ტიპის საშენი მასალით დავეხმარეთ”.

ახალციხის მუნიციპალიტეტის ეკონომიკისა და ინფრასტრუქტურის სამსახურის მთავარი სპეციალისტის ზურა ყულიჯანიშვილის განმარტებით კი გასული წლის აპრილიდან დღემდე, რაიმე ტიპის სამშენებლო მასალა ლამარა დარბაიძეზე არ გაცემულა: “მანამდე მე აქ არ ვმუშაობდი და ვერაფერს გეტყვით”.

ახალციხის მუნიციპალიტეტის გამგებლის გელა დემეტრაძის თქმით, გასულ წელს ბიუჯეტში ჩასმული იყო მუხლი, რომელიც მხოლოდ სტიქიით დაზარალებული ოჯახებისთვის ითვალისწინებდა დახმარებას. წელს კი აღნიშნულ მუხლს სახელი შეეცვალა და აქ წარმოდგენილი თანხა სტიქიით დაზარალებულ ოჯახებთან ერთად სოციალურად დაუცველთა დახმარებასაც გულისხმობს: “მოგვმართონ კიდევ ერთელ განცხადებით და შესაძლოა დავეხმაროთ”.

[თამუნა უჩიძე, ახალციხე]