გაჭირვებული ოჯახი ხელისუფლებას დახმარებას სთხოვს

ბ. ბ. ახალციხის მუნიციპალიტეტის სოფელ ხეოთში ოროთახიან ბინაში შვილებთან ერთად ცხოვრობს. მეუღლე ექვსი წლის წინ გარდაეცვალა. დაზიანებული სახურავის გამო, წვიმიან ამინდში, სახლშიც ისევე წვიმს, როგორც გარეთ. სიცივისგან დასაცავად დახეთქილ კედლებში ძველი ტანსაცმელებია ჩაწყობილი. ოჯახის დიასახლისი ამბობს, რომ დასახმარებლად ადგილობრივ თვითმმართველობას რამდენჯერმე მიმართა, თუმცა დაპირების მიუხედავად, არაფერი შეცვლილა.

- ”წინა ხელისუფლების დროსაც დავწერე განცხადება. დამპირდნენ დაგეხმარებითო, 5 კუბური მეტრი მასალა გამომიყვეს, მაგრამ ჩემამდე არაფერი მოსულა. ჭერი თავზე გვენგრევა, ხის მორები შევუდგით, რომ არ დაგვეცეს”, - გვეუბნება დიასახლისი.

ოჯახის ერთადერთი შემოსავალი სოციალური დახმარებაა. მიწებს მხოლოდ მცირე რაოდენობით ამუშავებენ. დიასახლისი ამბობს, რომ ჯანმრთელობის მდგომარეობის გამო დიდი ფიზიკური დატვირთვა არ შეუძლია.

დიასახლისი გვეუბნება, რომ უკიდურესმა გაჭირვებამ მისი შვილი სუციდამდე მიიყვანა.

- ”სავალდებულო სამსახურში კუჭის დაავადება გაუჩნდა, ექიმის ცნობაც მაქვა ამის შესახებ. სამკურნალო ფული კი არა, საჭმელიც არ გვქონდა. ჯარიდან წამოსვლის შემდეგ, დაავადების გამო, ვერსად ვეღარ მოეწეყო, საკონტრაქტო სამსახურში უნდოდა მისვლა და არ მიიღეს. ვეღარც ტკივილებს გაუძლო ალბათ და ვეღარც ამდენ გაჭირვებას და სრულიად ახალგაზრდამ სიცოცხლე თვითმკვლელობით დაასრულა. მინდა ჩემი ტკივილი ყველამ გაიგოს და დამეხმარონ, სხვა შვილებიც მაგ ზღვრამდე რომ არ მივიდნენ”, - ამბობს იგი.

ტრაგედიის შემდეგ ოჯახს დახმარება სოფლის ტერიტორიული ორგანოს რწმუნებულმა ბადრი ზაზაძემ აღუთქვა და ფულად დახმარებას შეპირდა.

- ”ჩემი პირადობა წაიღო, მითხრა, რომ პირად ანგარიშს გაგვიხსნიდა და თანხას გადმოგვირიცხავდა. მაგრამ, რა ხდება ვერ გეტყვით, რამდენჯერაც მივედი, ანგარიშზე თანხა არ იყო”, -გვითხრა მან.

ბადრი ზაზაძე ამბობს, რომ გაჭირვებული ოჯახის შესახებ ინფორმაცია ადგილობრივ ხელისუფლებას მიაწოდა. თუმცა იმის გამო, რომ ადგილობრივი ბიუჯეტიდან ცალკეული ოჯახებისთვის ფულადი კომპენსაციის გაცემა გათვალისწინებული არ არის, ბექაურების ოჯახს ვერ ეხმარებიან.

- ”ასეთი გაჭირვებული საქართველოში ძალიან ბევრია, მაგრამ არ დევს ადგილობრი ბიუჯეტში სახსრები, რომ გაიცეს. პირადად მივიტანე პირადობის ასლი და ანგარიშის ნომერიც ”ლიბერთი ბანკიდან” და საფინანსო სამსახურში შევიტანე”,- გვითხრა ბადრი ზაზაძემ.

ახალციხის მუნიციპალიტეტის გამგეობაში ამბობენ, რომ ამ საკითხთან დაკავშირებით დაწვრილებით ინფორმაციას არ ფლობენ. საკითხს შეისწავლიან და შემდეგ გადაწყდება დაეხმარებიან თუ არა დაზარალებულ ოჯახს.

- ”უნდა მივიდე და პირადად შევისწავლო ოჯახი, რაც არ მინახავს, იმაზე ძნელია გავაკეთო კომენტარი. თუ არ ჰყავს მარჩენალი და ჰყავს მცირეწლოვანი შვილები, საცხოვრებელი სახლიც თუ ენგრევა, ბიუჯეტიდან თუ არა, სხვა ფორმით, ან სპონსორის საშუალებით მაინც უნდა შევძლოთ დახმარება გავუწიოთ ოჯახს”, - გვითხრა მუნიციპალიტეტის გამგებლის მოვალეობის შემსრულებელმა ბესიკ ხითარიშვილმა.

ოჯახის ვინაობას ”სამხრეთის კარიბჭე” შეგნებულად არ ასაჯაროებს. დაინტერესებულ ადამიანებს, ვისაც მათი დახმარების სურვილი გაუჩნდება, შეუძლიათ ”სამხრეთის კარიბჭეს” რედაქციას მომართონ.

[თინათინ ზაზაძე, ახალციხე]