რამდენი იქნება აბასთუმნის სკოლის შენობის ქირა, ჯერ უცნობია

ადიგენში, სოფელ აბასთუმნის საჯარო სკოლაში, სკოლის შენობის შესასწავლად განათლების სამინისტროს ინფრასტრუქტურის დეპარტამენტის წარმომადგენლებს ელოდებიან.

„მათ უნდა შეაფასონ სკოლის შენობა, აზომონ ფართობი და დათვალონ ღირებულება“, – ამბობს ადიგენის საგანმანათლებლო რესურსცენტრის უფროსი ინგა ბოჭორიშვილი.

მისი თქმით, მშენობა იმისთვის უნდა შეისწავლონ, რომ მისი ქირის ღირებულება განსაზღვრონ.

განათლების სამინისტროს საზოგადოებასთან ურთიერთობის სამსახურში აცხადებენ, რომ ადიგენის საგანმანათლებლო რესურსცენტრიდან აბასთუმნის სკოლის შენობის შესწავლასთან დაკავშირებით წერილი ნამდვილად შესულია. თუმცა, ამავე უწყების ინფრასტრუქტურის დეპარტამენტს ამ დრომდე რაიმე დავალება ან შეტყობინება არ მიუღია: „ჩვენ უნდა მივიღოთ დავალება, ისე რაიმეს გაკეთება ჩვენი კომპეტანცია არაა. ასეთი წერილი კი ინფრასტრუქტურის დეპარტამნეტში არ შემოსულა“.

შეგახსენებთ, რომ სკოლაში სამინისტროს მხრიდან ქირის გადახდის საკითხი მას შემდეგ დადგა, რაც შენობა თბილისის სააპელაციო სასამართლოს გადაწყვეტილების მიხედვით, ადგილობრივ ბიზნესმენს გენადი ენდელაძეს დაუბრუნდა.

[თამუნა უჩიძე, ადიგენი]