აბასთუმნის სკოლის შენობის საქმის განხილვა დასრულდა

დღეს, 12 აპრილს გამართულ სხდომაზე, მხარეებმა ყველა მტკიცებულება გამოიკვლიეს.

ადიგენის მერიის წარმომადგენლები აცხადებენ, რომ მათ 1991 წელს დადებული ხელშეკრულების გაუქმებაზე პრეტენზია არ გააჩნიათ: „კი ბატონო, გაუქმდეს ხელშეკრულება, მაგრამ ჩვენ რა შუაში ვართ არ ვიცით. 2004 წლიდან სკოლები განათლების სამინისტროს გადაეცა და ახალი ხელშეკრულება რომც გაფორმდეს, არც მაშინ ვიქნებით შუაში“,– ამბობს ადიგენის მერიის იურისტი გიორგი ჩიხლაძე.

ენდელაძის სასარჩელო მოთხოვნას არ ეთანხმებიან, აბასთუმნის სკოლის დირექტორი და რესურსცენტრის წარმომადგენელი: „სარჩელს არ ვეთანხმებით, მაგრამ ვფიქრობთ, რომ სკოლის შენობასთან დაკავშირებით დოკუმენტები ნამდვილად მოსაწესრიგებელია“,–განაცხადა სხდომაზე რესურსცენტრის იურისტმა გია დალალიშვილმა.

მოსარჩელე გენადი ენდელაძე ამბობს, რომ მას ხელშეკრულების გაუქმების შემდეგ, სკოლის შენობის გაქირავება და თანხის მიღება სურს: „თუ ქირას არ გადამიხდიან, სამართლებრივად დოკუმენტები ისე მაინც მოაწესრიგონ, რომ სკოლაში რაღაცის გაფუჭების შემთხვვაში პასუხისმგებლობა მე არ დამაკისრონ. მაგალითად, შენობა ავარიულია და ვინმე რომ დაშავდეს, პასუხი მე არ უნდა მომთხოვონ“.
მოსამართლე გადაწყვეტილებას 25 პარილს 13:00 საათზე გამოაცხადებს.

შეგახსენებთ, რომ გენადი ენდელაძეს სასამართლოში სარჩელი გასულ წელსაც ჰქონდა შეტანილი. იგი შენობიდან მოსწავლეებისა და პედაგოგების გამოსახლებას ითხოვდა, თუმცა აღნიშნულზე მოსამართლეს გადაწყვეტილება არ მიუღია, რადგან, ენდელაძემ სარჩელი უკან გაიხმო.

აბასთუმნის სკოლის ირგვლივ დავა წლებია მიმდინარეობს. გენადი ენდელაძემ შენობა, რომელშიც აბასთუმნის საჯარო სკოლა 1992 წლიდანაა განთავსებული 1991 წლამდე იყიდა. მაშინ აქ ყველ–კარაქის ქარხანა იყო. მოგვიანებით კი, როგორც თავად ამბობს, სოფლის და რაიონის მაშინდელი გამგებლების თხოვნით, შენობა სკოლას დაუთმო.

[ლუბა გიორგაძე, ადიგენი]