ახალციხის სოფლებს სამი სახელობითი სკვერი შეემატება

ახალციხის სოფლების, აგარის, გიორგიწმინდისა და ტყემლანის სკვერების სახელების მინიჭებაზე საკრებულომ დღეს, 23 ივნისს იმსჯელა.
აგარის სკვერს 2008 წლის რუსეთ–საქართველოს ომში დაღუპული სპეცრაზმელის მარატ ნოზაძის სახელი მიენიჭება.

მარატ ნოზაძე ამავე სოფლის მკვიდრი იყო. იგი 1975 წლის 26 მაისს დაიბადა. აგარაში დაამთავრა 8 წლიანი სკოლა. იგი 2008 წლის 14 დეკემბერს გორის ერთ–ერთი სოფლის სკოლის ეზოში განაღმვითი სამუშაოების დროს დაიღუპა, ნაღმს გადაეფარა და თანამებრძოლები დაიცვა. გარდაცვალების შემდეგ მარატ ნოზაძეს ვახტანგ გორგასლის მეორე ხარისხის ორდენი აქვს მიღებული. ასევე მისი სახელობისაა თბილისის ერთ–ერთი სკვერი.

რაც შეეხება გიორგიწმინდისა და ტყემლანის სკვერებს, როინ სამსონიძისა და ნუგზარ ექსოულის სახელობის იქნება. ორივე მათგანი აფხაზეთის ომში იბრძოდა და ტამიშის ბრძოლაში გრმირულად დაიღუპა.

აღნიშნული სოფლებიდან სკვერი აგარაში უკვე გაკეთებულია, დანარჩენ ორ სოფელში კი სამუშაოები მიმდინარეობს.

ახალციხის თემის საკრებულოს იურიდიული კომისიის თავმჯდომარის თამარ გოგინაშვილის განმარტებით, დღეს საკრებულომ მხოლოდ აგარის სკვერის სახელწოდებასთან დაკავშირებით იმსჯელა, რადგან სახელდების შესახებ 2015 წლის 1 ივნისის N239 დადგენილების მიხედვით, თუ პიროვნების გარდაცვალებიდან 20 წელზე ნაკლებია გასული, მისი სახელისა და გვარის რომელიმე ტერიტორიისათვის მინიჭების საკითხზე, გადაწყვეტილება საკრებულომ გამონაკლისის სახით უნდა მიიღოს. (მარატ ნოზაძე გარდაცცვალა 9 წლის წინ, 2008 წლის 14 დეკემბერს).

"ეს ეხებოდა მხოლოდ აგარის სკვერს. თუ 20 წელი არ არის გასული გარდაცვალებიდან, საკრებულომ უნდა დაადგინოს საგამონაკლისო წესი, რამდენად შეიძლება ამ სახელის მინიჭება. შესაბამისად, ჩვენ დღეს მივიღეთ განკარგულება, რომ არ ვართ წინააღმდეგი და ამარატ ნოზაძის სახელი მიენიჭოს", – განაცხადა თამარ გოგინაშვილმა.

[თინათინ ზაზაძე, ახალციხე]