აგარასა და ტყემლანაში სკვერებს ომში დაღუპული გმირების სახელები მიენიჭა

აგარის სკვერს 2008 წლის რუსეთ–საქართველოს ომში დაღუპული სპეცრაზმელის მარატ ნოზაძის სახელი მიენიჭეა.

მარატ ნოზაძე ამავე სოფლის მკვიდრი იყო. იგი 1975 წლის 26 მაისს დაიბადა. აგარაში დაამთავრა რვაწლიანი სკოლა. იგი 2008 წლის 14 დეკემბერს გორის ერთ–ერთი სოფლის სკოლის ეზოში განაღმვითი სამუშაოების დროს დაიღუპა, ნაღმს გადაეფარა და თანამებრძოლები დაიცვა. გარდაცვალების შემდეგ მარატ ნოზაძეს ვახტანგ გორგასლის მეორე ხარისხის ორდენი აქვს მიღებული. ასევე მისი სახელობისაა თბილისის გლდანის რაიონში მდებარე ერთ–ერთი ქუჩა.

ტყემლანის სკვერი ნუგზარ ექსოულის სახელობის იქნება. იგი აფხაზეთის ომში 1992 წელს, ტამიშთან დაიღუპა. გარდაცვლილი მებრძოლი ტყემლანიდან არის, იგი ეროვნულ გვარდიაში მსახურობდა.

„ახალგაზრდებს უნდა დავუფასოთ ის, რაც თავიანთი ქვეყნისთვის გააკეთეს. ეს ჩვენი ვალია“, –ამბობს საკრებულოს თავმდჯომარე გელა ნოზაძე.

მისი თქმით, გარდაცვლილი მეომრის სახელი დაერქმევა სკვერს სოფელ გიორგიწმინდაშიც: „აქ სკვერს როინ სამსონიძის სახელი დაერქმევა. დღეს ამ საკითხის სხდომაზე გატა ტექნიკური მიზეზების გამო ვერ შევძელით“.

მუნიციპალიტეტის ადმინისტრაციულ საზღვრებში მდებარე გეოგრაფიული ობიექტების სახელდების კომისიას, სკვერებზე სახელის დარქმევის მოთხოვნით საკრებულომ 2017 წელს მიმართა.

[თინათინ ზაზაძე, ახალციხე]