ახალციხის სამ სოფელში სკვერებს სახელს მიანიჭებენ

ახალციხის მუნიციპალიტეტის გამგეობას სკვერებისთვის სახელის მინიჭების თხოვნით ადგილობრივებმა მიმართეს.როგორც ახალციხის მუნიციპალიტეტის საკრებულოს საფინანსო-საბიუჯეტო, ეკონომიკისა და ქონების მართვის საკითხთა კომისიის თავმჯდომარე თემურ ბარძიმაძე აცხადებს, გამგეობამ თავის მხრივ აღნიშნული საკითხი განსახილველად საკრებულოს გადაუგზავნა.

მოსახლეობის სურვილის გათვალისწინებით, სოფელ აგარის სკვერს, 2008 წელს სამაჩაბლოში სამსახურეობრივი მოვალეობის შესრულებისას დაღუპული კაპიტნის მარატი გენადის ძე ნოზაძის სახელი მიენიჭება, რომელსაც „მარატი ნოზაძის სახელობის სკვერი“ დაერქმევა.

სოფელ ტყემლანის სკვერს, 1992 წელს აფხაზეთში საქართველოს ტერიტორიულ მთლიანობისათვის ბრძოლაში დაღუპული ნუგზარი პავლეს ძე ექსოულიძის სახელი მიენიჭება, რომელსაც „ნუგზარი ექსოულიძის სახელობის სკვერი“ დაერქმევა.

ხოლო, სოფელ გიორგიწმინდის სკვერს, 1993 წელს აფხაზეთში საქართველოს ტერიტორიული მთლიანობისათვის ბრძოლაში დაღუპული რიონ ოთარის ძე სამსონიძის სახელი მიენიჭება, რომელსაც „რიონ სამსონიძის სახელობის სკვერი“ დაერქმევა. სამივე მათგანი, ამავე სოფლების მკვიდრია.

თემურ ბარძიმაძის თქმით, სკვერების შესახებ ყველა ინფორმაცია მუნიციპალიტეტის ვებგვერდზე დევს და ნებისმიერ მოქალაქეს, წლის 19 ივნისამდე შესაძლებლობა აქვს, სკვერების სახელწოდებებთან დაკავშირებით თავიანთი მოსაზრებები მიაწოდონ.

19 ივნისის შემდეგ კი სახელწოდებები სამთავრობო კომისიას გადაეგზავნება და სკვერებს სახელწოდებები ოფიციალურად მიენიჭებათ.

[ლუბა გიორგაძე, ახალციხე]