ახალქალაქში აგვისტოს ომში დაღუპული თამაზ მიქელაძის სახელობის ქუჩა იქნება

ამის შესახებ, გეოგრაფიული ობიექტების სახელწოდებათა დადგენის, ნორმალიზების, გამოყენების, აღრიცხვისა და დაცვის სამთავრობო კომისიამ იმსჯელა, რომელსაც რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი ხელმძღვანელობს.

კომისიის გადაწყვეტილებით, საქართველოს რეგიონებში მდებარე 50-მდე ქუჩას და რამდენიმე სკვერს ახალი სახელწოდება მიენიჭა. მაგალითად, ახალქალაქში მდებარე ფელიქს დერჟინსკის ქუჩას 2008 წლის ომში გმირულად დაღუპული უფროსი სერჟანტის თამაზ მიქელაძის სახელი დაერქვა. გურჯაანის მუნიციპალიტეტის სოფელ კარდენახში მდებარე სკვერს 2008 წლის ომში დაღუპული გმირების სახელობის სკვერი ეწოდა. ხოლო, სიღნაღის მუნიციპალიტეტის სოფელ ტიბაანში მდებარე ქუჩას აფხაზეთის ომში დაღუპული, ვახტანგ გორგასლის ორდენოსანი გმირის ლევან ცისკარიშვილის სახელი მიენიჭა.

თვითმმართველ ერთეულების მიერ წარდგენილი სხვა წინადადებების ერთ ნაწილს, სახელმწიფო კომისიის მხრიდან დაკმაყოფილებაზე უარი ეთქვა, ხოლო რამდენიმე ქუჩის სახელწოდების შეცვლასთან დაკავშირებით გადაწყვეტილების მიღება, საკითხის დამატებითი შესწავლის მიზნით, უახლოეს სხდომამდე გადაიდო.

[skneww.ge]