ბათუმი–ახალციხის გზაზე დასაქმებულთა ნაწილს ხელფასი ისევ არ აუღია

ბათუმი–ახალციხის გზის 8.5 კმ–იან მონაკვეთზე დასაქმებული 15–მდე მუშა ისევ სახელფასო დავალიანების ანაზღაურებას ელოდება.
ისინი ამბობენ, რომ კომპანია „ჩელიაბინსკ ტრანსსიგნალის“ ხელმძღვანელობა კუთვნილი ხელფასების დარიცხვას ყოველ კვირაში ჰპირდება თუმცა არ ურიცხავს.

„ვისაც ცოტა ჰქონდა დარჩენილი დავალიანება, ყველას ჩაურიცხეს, ვისაც ბევრი გვაქვს ასაღები, არ გვაძლევენ, ყოველ კვირაში გვპირდებიან“, – ამბობს ერთ–ერთი დასაქმებული ოლეგ ჩილინგარაშვილი, რომელიც გზის რეაბილიტაციაზე სამი თვის განმავლობაში, საკუთარი სატვირთო მანქანით მუშაობდა და დამსაქმებელ კომპანიას 12 100 ლარი აქვს მისი ვალი.

„კომპანიის უფროსი რაინდი ქანთარია იყო ჩამოსული, ავუხსენი, რომ მანქანის საბურავებიც ვალით მაქვს აღებული, იმიტომ, რომ გზაზე ვმუშაობდი და ახლა ფულს მთხოვენ, პირობა დადო, რომ დღეს დაგვირიცხავდნენ, მაგრამ არ გვირიცხავენ“, –გვიხსნის ოლეგ ჩილინგარაშვილი.

ჩილინგარაშვილის მსგავსად დაპირებული ხელფასი არ აუღია დავით იაძესაც, რომელიც ასევე სატვირთო მანქანის მძღოლია: „არ ვიცი ჩვენ რატომ არ დაგვირიცხეს, გვპირდებიან და ამასობაში გზაზე სამუშაოებიც დასრულდება, ჩვენს გარდა კიდევ სურამიდან და ხაშურიდანაც არიან, ვისაც ხელფასი არ აუღია ისევ“.

გასარკვევად, რატომ ვერ მოხერხდა გზაზე დასაქმებული მუშების ნაწილისათვის სახელფასო დავალიანების ანაზღაურება ამ დრომდე, „სამხრეთის კარიბჭემ“ კომპანია „ჩელიაბინსკტრანსსიგნალის“ დირექტორთან რაინდი ქანთარიასთან სცადა დაკავშირება, თუმცა ვერ დავუკავშირდით.

ბათუმი–ახალციხის გზის მშენებლობა კი უკვე დასასრულს უახლოვდება, ამ დროისათვის გზის მცირე მონაკვეთის მოსფალტებაა დარჩენილი.
სამ თვიანი სახელფასო დავალიანების გამო 60–მდე მუშა პროტესტის ნიშნად მიმდინარე წლის 3 მაისს გაიფიცა. მუშებმა გზაზე, ჯერ საპროტესტო აქცია გამართეს, შემდეგ კი სამუშაო პროცესი შეაჩრეს და ვიდრე კომპანია დავალიანებას არ აუნაზღაურებდა, სამუშაოების გაგრძელებას არ აპირებდნენ. დასაქმებული მუშების უმეტესობას ხელფასები 17 მაისს დაერიცხა, ნაწილი კი ამ დრომდე ელოდება.

[ლუბა გიორგაძე, ადიგენი]