‘ლენდოს’ დაყაჩაღებაში ბრალდებული პატიმრობაში 4 წელს გაატარებს

ახალციხის რაიონულმა სასამართლომ საქმეზე დღეს, 31 მაისს იმსჯელა. დაზარალებულის, ბრალდებულის ადვოკატისა და პროკურორის შეთანხმება მოსამართლე მარიკა ჩიტაშვილმა დაამტკიცა.

საპროცესო შეთანხმების შესაბამისად, „ლენდოს“ დაყაჩაღბაში ბრალდებული პ.გ საპატიმრო დაწესებულებაში 4 წელს გაატარებს.

„ბრალის სიმძიმიდან გამომდინარე, მხარეები საბოლოოდ ამ გადაწყვეტილებაზე შევთანხმდით“, –განაცხადა სასამართლო სხდომაზე ბრალდებულის ადვოკატმა ნუგზარ სამარჯიშვილმა.

ბრალდებულისათვის საპროცესო შეთანხმების თაობაზე პ.გ–ს ადვოკატმა ნუგზარ სამარჯიშვილმა პროკურატურას ჯერ კიდევ 11 აპრილს მიმართა. იგი მისი დაცვის ქვეშ მყოფისთვის, ერთი ან ორი წლით თავისუფლების აღკვეთას მოითხოვდა.

შეგახსენებთ, რომ ახალციხეში კომპანია "ლენდოს" ფილიალი მიმდინარე წლის 16 თებერვალს დააყაჩაღეს. გამოძიება ახალციხელ შუახნის მამაკაცს ყაჩაღობასა და ცეცხლსასროლი იარაღის მართლსაწინააღმდეგო შენახვა–ტარებას ედავება. საქმეზე ძიება სსკ–ს 179–ე და 236–ე მუხლებით მიმდინარეობდა.

[ლუბა გიორგაძე, ახალციხე]