„ლენდოს“ დაყაჩაღებაში ბრალდებულს აღკვეთის ღონისძიებად პატიმრობა შეეფარდა

„ლენდოს“ ფილიალის დაყაჩაღებაში ბრალდებულის აღკვეთი ღონისძიების შეფარდებაზე, ახალციხის რაიონულმა სასამართლომ დღეს, 18 თებერვალს იმსჯელა.

სხდომაზე პროკურომა კახა ლეკიშვილმა, ბრალდებულისათვის პატიმრობის შეფარდება მოითხოვა, რაც იმით ახსნა, რომ შესაძლოა პ.გ –მ გამოძიებასთან არ ითანამშრომლოს და მიიმალოს. გარდა ამისა, პროკურომა ერთერთ მიზეზად, მისი ეკონომიური მდგომარეობაც დაასახელა.

„მომხდარიდან რამდენიმე საათში ასპინძის ქუჩაზე დავაკავეთ, რადგან მიმალვას ცდილობდა, ამავედროს მან ეს დანაშაული ეკონომიური მდგომარეობის გამო ჩაიდინა. ამით კი არაფერი შეცვლილა და არსებობს საფრთხე, რომ იგივეს გაიმეორებს“–განაცხადა, სხდომაზე კახა ლეკიშვილმა.

სხდომაზე, პროკურორმა გამოძიების რამდენიმე დეტალზეც ისაუბრა და განაცხადა, რომ 16 თებერვალს, კომპანია „ლენდოში“ ბრალდებული ხელყუმბარით შეიჭრა და ფილიალის თანამშრომელზე მუქარით, 4 825 ათასი ლარი წაიღო. სამართალდამცველებმა იგი, რამდენიმე საათში, ახალციხეშივე ასპინძის ქუჩაზე დააკავეს.

ყაჩაღობაში ბრალდებულს პ.გ–ს სასამართლო სხდომაზე ადვოკატი არ ყოლია. იგი დანაშაულს აღიარებს.

ბრალდებულმა სასამართლო პროცესზე, ყურადღება მხოლოდ პროკურორის დასახელებულ მიმალვის ბრალდებაზე გაამახვილა და განაცხადა, რომ დაკავების პროცესში იგი მიმალვას არ ცდილობდა.

„ასპინძის ქუჩიდან ჩემს სახლში მივდიოდი, დამირეკეს და მითხრეს რომ მეძებდნენ და სახლში მელოდებოდნენ, ასე რომ არ დავმალულვარ“–განაცხადა სასამართლო სხდომაზე პ.გ–მ.

საქმეზე წინასასამართლო სხდომა 11 აპრილს ჩაინიშნა.

შეგახსენებთ, რომ ახალციხეში კომპანია „ლენდოს“ ფილიალი 16 თებერვალს საღამოს დააყაჩაღეს. სამართალდამცველებმა ყაჩაღობაში ბრალდებული, შუა ხნის ახალციხელი მამაკაცი ცხელ კვალზე დააკავეს. გამოძიება სსკ–ს 179–ე და 236–ე მუხლებით მიმდინარეობას, რაც ყაჩაღობასა და ცეცხლსასროლი იარაღის მართლსაწინააღმდეგო შენახვა–ტარებას გულისხმობს.

[ლუბა გიორგაძე, ახალციხე]