სამუშაო შეხვედრა სამცხე–ჯავახეთის საჯარო სკოლების მანდატურებთან დღეს, 30 მაისს ახალციხის მეხუთე საჯარო სკოლაში გაიმართა. მინისტრის მოადგილემ შეხვედრაზე, სკოლებში შესუსტებული დისციპლინის შესახებ ისაუბრა.
„თბილისში გვქონდა შემთხვევები, როცა მანდატურები დაუმეგობრდნენ სკოლის დირექტორს და რაიმე დარღვევაზე ამის გამო აღარ რეაგირებდნენ. მათ ეგონათ, რომ ამ გადაცდომებზე სკოლის დირექტორებს პასუხს მოთხოვდნენ. ვაცხადებ, რომ ამის გამო არცერთი დირექტორი არ მოგვიხსნია და არც დაგვისჯია“, – განაცხადა შეხვედრაზე გიგაურმა.
მისი თქმით,საჭიროა პოლიტიკა გამკაცრდეს: „სკოლებში მოეშვა დისციპლინა, იმის გამო რომ ჩვენ არ ვსჯიდით და პერსონალურად დახმარების მიზნით ვმუშაობდით სკოლის დირექტორებთან. ასე გვსურდა, რომ მანდატურებთან ერთად გაგვეძლიერებინა დისციპლინა. მაგრამ აღმოჩნდა, რომ თუ სადამსჯელო სანქციები არ არის ინტეგრირებული, მხოლოდ დახმარების შეთავაზებით გადაწყვეტილებების მიღება არ ხდება შესაბამისად“.
მისივე თქმით, მომავალი წლიდან ამ თვალსაზრისით მიდგომები გამკაცრდება: „იქ სადაც არის დარღვევები და რეაქცია არ აქვთ, ანუ დირექტორი ვერ მუშაობს, ძალიან მკაცრ გადაწყვეტილებას მივიღებთ. პრევენციას ყველა ერთად უნდა ვახდენდეთ, დირექტორიც, მანდატურიც და მასწავლებელიც“.
ლია გიგაურის თქმით, ობიექტურ ინფორმაციას სკოლაში არსებულ მდგომარეობაზე სწორედ მანდატურის სამსახურის საშუალებით უნდა იგებდნენ.
„უნდა ხდებოდეს რეაგირება. ბევრგან მოშლილია დისციპლინური კომიტეტები. ამის გამო სკოლებში ისეთი დისციპლინა აღარ არის, როგორიც იყო მაგალთად შარშან. ჩვენ გარკვეული პერიოდი ვთხოვდით მანდატურებს რომ არ მოეხდინათ რეაგირება და მხოლოდ ინფორმაცია მოეწოდებინათ. ახლა ჩვენ ვითხოვთ მათ, რომ რეაგირება მოახდინონ და შესაბამისი აქტიც შეადგინონ. თუ არ ტარდება გაკვეთილები ჩვენ ეს უნდა ვიცოდეთ და ეს დოკუმენტურადაც უნდა გაფორმდეს“.
სამუშაო შეხვედრას განათლების სამინისტროს სხვა წარმომადგენლებიც ესწრებოდნენ. მათი განმარტებით სამცხე–ჯავახეთი ერთ–ერთია იმ რეგიონებს შორის, სადაც მანდატურები არა ერთ დარღვევას აფიქსირებენ: „თუმცა მათ შორის მნიშვნელოვანი დარღვევა არცერთი არ ყოფილა“.
ახალციხის საგანმანათლებლო რესურსცენტრის ხელმძღვანელის ხათუნა ხმალაძის განმარტებით, ძალიან მნიშვნელოვანია გაიზარდოს იმ სკოლების რიცხვი, რომლებშიც მანდატურები იქნებიან. მისივე თქმით, რესურსცენტრის ინიციატივით სკოლებში შექმნილია „მშობელთა კლუბები“: „ასე ჩვენი წარმომადგენლები აქტიურად ხვდებიან მშობლებს და სხვადასხვა მნიშვნელოვან საკითხს ერთად განიხილავენ“.
განათლების სამინსიტროს ინფრომაციით სამცხე–ჯავახეთის სკოლებს ბოლო პერიოდში 15 ახალი მანდატური დაემატა. ისინი ნინოწმინდისა და ახალქალაქის სკოლებში გადანაწილდნენ.
„მნიშვნელოვანია ის, რომ კონკურსის წესით ადგილობრივი კადრები შეირჩნენ, მათ გაიარეს სპეციალური მომზადება, მათ შორის ძალადობის იდენტიფიკაციასა და რეაგირების საკითხებში, მოსწავლეთა ასაკობრივ ფსიქოლოგიაში“, – განაცხადა ლია გიგაურმა.
სამცხე–ჯავახეთში ჯამში 14 საჯარო სკოლაშია მანდატური.
[თინათინ ზაზაძე, ახალციხე]