ბავშვთა მიმართ ძალადობის პრევენციისთვის სკოლების ადმინისტრაციები გადაამზადეს

„ბავშვთა მიმართ ძალადობა –გადამისამართების პროცედურები ბავშვის დაცვის საჭიროების შემთხვევაში“, ასე ქვია პროექტს, რომელიც იმ სკოლებში განხორციელდა, რომლებშიც მანდატურის სამსახური არ არის. პროექტის მთავარი მიზანი ძალადობის პრევენცია, ბავშვზე ძალადობის შემთხვევების ამოცნობა, მათზე რეაგირება და რეფერირების პროცედურების განხორციელებაა.

„ორდღიანი ტრენინგი 19–მა მათგანმა გაიარა და დღეს განათლების მინისტრის მოადგილემ, ლია გიგაურმა გადასცა სერთიფიკატები. სატრენინგო კურსი მოიცავდა თეორიულ მასალას ბავშვთა მიმართ ძალადობის საკითხებზე, ჯგუფთან მუშაობის პრინციპებს, თემატურად დაკავშირებულ საკითხებს და აქტივიზატორებს. ამ კურსის ძირითადი მიზანია მათ იცოდნენ ძალადობის შემთხვევების გამოცნობა, იდენტიფიცირება. თუ როგორ მოახდინონ რეაგირება, შემდეგ რა ზომებს მიმართონ, ვისთან გადაამისამართონ, ანუ რეფერირების პროცედურები“, – განაცხადა ფსიქოლოგმა სალომე კაკაბაძემ.

მისივე თქმით, პროექტი, რომელსაც სსიპ საგანმანათლებლო დაწესებულების მანდატურის სამსახურის ფსიქოლოგიური მომსახურების ცენტრი ახორციელებდა უკვე დასრულდა. ორდღიანი სასწავლო კურსი სამცხე–ჯავახეთში ჯამში 140–მა დირექტორმა და მოადგილემ გაიარა.

„ასეთი სწავლება პედაგოგებსაც სჭირდებათ, განვიხილეთ შემთხვევა, როდესაც მოსწავლე მივიდა თვითმკვლელობამდე, როდესაც სწორი ინფორმაცია ექნება მშობლებს, პედაგოგებს, ეს ძალიან მნიშვნელოვანია“, – განაცხადა სპასოვკის N1 საჯარო სკოლის დირექტორმა ციური ხოზრევანიძემ

[თინათინ ზაზაძე, ახალციხე]