სკოლებში სწავლა 1–ლი თებერვლიდან განახლდება

შეგახსენებთ, ბოლო, მონაცემებით, სასწავლო პროცესი სამცხე–ჯავახეთის 49 სკოლაშია შეჩერებული.

საქართველოს განათლებისა და მეცნიერების მინისტრის მოადგილის ლია გიგაურის განმარტებით, გუშინ გრიპის ვირუსების გამო სწავლა 276 სკოლაში იყო შეწყვეტილი, დღეს ამ სკოლებს კიდევ 15 საჯარო სკოლა დაემატა.

აღნიშნულის შესახებ გიგაურმა თბილისის N87 სკოლაში სტუმრობისას განაცხადა. სკოლას სამინისტროდან მონიტორინგის მიზნით ესტუმრნენ.

„გადავწყვიტეთ მონიტორინგი ვაწარმოოთ ადგილზე სკოლებში რამდენად სწორად ხდება პრევენციული ღონისძიებების გატარება", - აღნიშნა ლია გიგაურმა.

მინისტრის მოადგილემ იმედი გამოთქვა, რომ იმ სკოლებში, სადაც ამჟამად სწავლა შეჩერებულია, არსებული ვითარება დროულად გამოსწორდება.

„ყველა იმ სკოლაში, სადაც ამჟამად სწავლის პროცესი შეჩერებულია, სწავლა პირველი თებერვლიდან განახლდება. სკოლებში ადგილზე გასვლას, დასწრებისა და რეკომენდაციის შესრულების მონიტორინგს კვლავაც გავაგრძელებთ. იმ შემთხვევაში თუ იქნება დამატებითი რისკები, დაავადებათა კონტროლის ეროვნულ ცენტრთან შეთანხმებით დამატებით გადაწყვეტილებებს მივიღებთ", - განაცხადა ლია გიგაურმა.

ამ დროისთვის სასწავლო პროცესი შეჩერებულია სამცხე–ჯავახეთის შემდეგ საჯარო სკოლებში:

ახალციხის მუნიციპალიტეტი: ქალაქის N2 სკოლა და ასევე სოფლების: წნისის, ანდრიაწმინდის, გურკელის, საძელის და დიდი პამაჯის სკოლები;

ადიგენის მუნიციპალიტეტი: სოფლების დიდი სმადისა და ზარზმის საჯარო სკოლები;

ბორჯომის მუნიციპალიტეტი: სოფლების ბალანთისა და ანდეზიტის სკოლები;

ახალქალაქის მუნიციპალიტეტი: ქალაქის N1, N2, N4 და N5 საჯარო სკოლებში; ასევე სოფლების: ალასტანის, ბავრის, ბეჟანოს, გოკიოს, დადეშის, ვარევანის, ვაჩიანის, იხტილის, კარტიკამის, კუმურდოს, მერენიის, ოლავერდის, ორჯის, სულდის, ტურცხის, ჩუნჩხის, ხანდოს, მურჯახეთის, კარწახის, ალათუმანის, არაგვის, ქარცეფისა და ოკამის №2 საჯარო სკოლებში;

ნინოწმინდის მუნიციპალიტეტი : სოფლების: ეფრემოვკის, პატარა ხანჩალის, ჟდანოვის, სამების, სათხის, დიდი არაქალის, ოროჯალარის, დიდი გონდრიოს, კატნატუს, ეშტიის N1სკოლა, გორელოვკის N2 და N3 საჯარო სკოლები.

შეგახსენებთ, სკოლებში სასწავლო პროცესის შეჩერების გადაწყვეტილება, საქართველოს განათლებისა და მეცნიერების სამინისტრომ დაავადებათა კონტროლის ეროვნული ცენტრიდან მიღებული რეკომენდაციების საფუძველზე, გრიპის ვირუსის გავრცელების პრევენციისთვის მიიღო. სწავლა სამი დღით იმ სკოლებში შეჩერდა, სადაც გაცდენების მაჩვენებელი 20%-ს აღემატება. გაცდენილი საათები შაბათი დღეების ხარჯზე ანაზღაურდება.

27 იანვრის დილიდან სწავლა შეწყდა სამცხე–ჯავახეთის 35 საჯარო სკოლაში, შუადღეს ჩამონათვალს 4, დღის ბოლოს კი 9 სკოლა დაემატა. 28 იანვარს ამ ჩამონათვალს ბორჯომის კიდევ ერთი სკოლა დაემატა.

[ნინო ნარიმანიშვილი, ახალციხე]