’კონსტიტუცია არ უნდა იყოს ვაჭრობის საგანი’ [Video]

მთავარი → SK TV » ვიდეო 20.03.2013

ახალციხის მცხოვრებთა ნაწილი, ფიქრობს, რომ კონსტიტუცია გამუდმებით არ უნდა იცვლებოდეს, ნაწილი კი მიიჩნევს, რომ ’ხალხის სასარგებლოდ’ ცვლილებები უნდა შედიოდეს.

საკონსტიტუციო ცვლილებების განხილვა 21 მარტის პლენარულ სხდომაზე იწყება. საკონსტიტუციო ცვლილებების მიღებას მინიმუმ 100 ხმა სჭირდება. ამჟამად ”ქართული ოცნების” უმრავლესობაში 83 დეპუტატი, ხოლო ”ნაციონალური მოძრაობის” უმცირესობაში 53 დეპუტატი ირიცხება.

”ერთიანი ნაციონალური მოძრაობა” მზად არის ხმა მისცეს „ქართული ოცნების“ მიერ ინიცირებულ საკონსტიტუციო ცვლილებებს პრეზიდენტის უფლებამოსილების თაობაზე, მაგრამ იმ პირობით, თუ პარლამენტი სარეიტინგო კენჭისყრას გამართავს. ამის შესახებ ”ნაციონალურმა მოძრაობამ” გადაწყვეტილება გუშინ, 19 მარტს, საღამოს მიიღო.

პარლამენტის თავმჯდომარის დავით უსუფაშვილის განცხადებით, სარეიტინგო გამოკითხვების გარეშეც ცხადია, რომ ცვლილებების პროექტი ვერ გავა, თუ მას ”ნაციონალური მოძრაობიდან” დეპუტატები მხარს არ დაუჭერენ, თუმცა იგი აცხადებს, რომ უმრავლესობა ითხოვს არა მათ მხარდაჭერას, არამედ პროცესში „თანამონაწილეობას“.

[ნინო ზედგინიძე, ახალციხე]