"ქართულმა ოცნებამ“ საკონსტიტუციო უმრავლესობა მოიპოვა

50 მაჟორიტარული ოლქიდან, სადაც არჩევნების მეორე ტური გაიმართა, 48 მათგანში გამარჯვებული ,,ქართული ოცნების“ დეპუტატია.
შესაბამისად, ორივე ტურის შედეგების მიხედვით, ახლად დაკომპლექტებულ პარლამენტში საკონსტიტუციო უმრავლესობას ,,ქართული ოცნების დეპუტატები წარმოადგენენ. ისინი პარლამენტში 115 დეპუტატით იქნებიან წარმოდგენილი.

სახელისუფლო პარტიამ პროპორციული წესით 44 მანდატი მიიღო, 73 მაჟორიტარული ოლქიდან კი, 71 მაჟორიტარი დეპუტატი გაიყვანა.

საპარლამენტო უმცირესობის სტატუსს შეინარჩუნებს კვლავაც ,,ერთიანი ნაციონალური მოძრაობა“. მეცხრე მოწვევის პარლამენტში იგი 27 დეპუტატით შევა.

საბოლოოდ, მეცხრე მოწვევის პარლამენტის შემადგენლობა ასეთი იქნება:

,,ქართული ოცნება“ – 115 მანდატი;
,,ერთიანი ნაციონალური მოძრაობა“ – 27 მანდატი;
,,პატრიოტთა ალიანსი“ – 6 მანდატი;
,,მრეწველები“– 1 მანდატი;
დამოუკიდებელი კანდიდატი –1 მანდატი.

ახალარჩეული პარლამენტის პირველი სხდომა 19 ნოემბრამდე უნდა გაიმართოს.

2016 წლის მოწვევის პარლამენტში 150 სადეპუტატო მანდატი 77 პროპორციული წესით არჩეულ დეპუტატსა და 73 მაჟორიტარს შორის ნაწილდება.

[თაკო ფეიქრიშვილი,ახალციხე]