‘ნაციონალური მოძრაობა’ საკონსტიტუციო ცვლილებების კენჭისყრაში მონაწილეობას არ მიიღებს

„ჩვენ გუშინ გვიან ღამემდე ვაწარმოებდით კონსულტაციებს, როგორც პარტიის შიგნით, ასევე, ჩვენს საერთაშორისო პარტნიორებთან იმისთვის, რომ შეგვექმნა სრული სურათი, თუ რა ბედი ელოდება 8 მარტის შეთანხმების შესრულებას. რადგან იცით, რომ ამ შეთანხმების ყველა პირობა დღემდე არ არის შესრულებული და პოლიტპატიმარი გიორგი რურუა რჩება საპყრობილეში. მიგვაჩნია, რომ ჩვენი გადაწყვეტილება, რომელიც რთული მისაღები იყო, რადგან ჩვენ სრულიად ვიზიარებთ იმ აზრს, რომ ეს საკონსტიტუციო ცვლილება მნიშვნელოვანია ქვეყნისთვის, დაგვეხმარება და დაეხმარება ქართულ საზოგადოებას და ოპოზიციას იმაში, რომ უახლოეს მომავალში შევძლოთ საერთაშორისო ორგანიზაციების აზრის მობილიზაცია, ზეწოლის გაზრდა ბიძინა ივანიშვილზე, რადგან ჩვენ გვესმის, რომ ზეწოლის გარეშე, ეს ხელისუფლება და ოლიგარქიული რეჟიმი, რა თქმა უნდა, არ აპირებს ქვეყანაში ნორმალური პოლიტიკური პროცესებისთვის შესაძლებლობის მიცემას",- განაცხადა სამადაშვილმა ბრიფინგზე.

დღეს, 21 ივნისს პარლამენტის რიგგარეშე სხდომა გაიმართება, სადაც საარჩევნო სისტემის შესახებ საკონსტიტუციო ცვლილებებს განიხილავენ და პირველი მოსმენით კენჭს უყრიან.

ცვლილებების პროექტის თანახმად, 2020 წლის საპარლამენტო არჩევნები შერეული საარჩევნო სისტემითა (120 პროპორციული, 30 მაჟორიტარული) და 1%-იანი ბარიერით ჩატარდება.

კანონპროექტი გულისხმობს ე.წ. 40%-იან ჩამკეტ მექანიზმსაც. პარტია, რომელიც 2020 წლის საპარლამენტო არჩევნებზე პროპორციული სისტემით 40.54%-ზე ნაკლებ მხარდაჭერას მიიღებს, მთავრობის დამოუკიდებლად ფორმირებას ვერ შეძლებს.

საკონსტიტუციო ცვლილებების დამტკიცებას, სულ მცირე, 113 დეპუტატის ხმა სჭირდება.

[sknews.ge]